Иссиқлик таъминоти тармоқларига улаш

Техник шарт ва лойиҳа талаб қилинмайдиган ҳолатлар

Техник шарт, иссиқлик таъминоти лойиҳасини ишлаб чиқиш ва келишиш қуйидаги ҳолларда талаб этилмайди:

маиший истеъмолчиларнинг хонадонлари ва шахсий уй-жойлари учун;
кўчмас мулк объекти бўйича аввал берилган техник шарт мавжуд бўлиб, объект бошқа шахсга ўтказилганда;
фуқаронинг фамилияси, исми ёки отасининг исми ўзгарганда;
юридик шахснинг ташкилий-ҳуқуқий шакли ёки фирма номи ўзгарганда;
иссиқлик истеъмоли ҳажми ўзгармасдан фаолият тури ўзгарганда.

Бундай ҳолларда фақат ҳисобга олиш тизимини ўрнатиш, пломбалаш ва иссиқлик таъминоти шартномасини тузиш учун мурожаат қилинади.

Иссиқлик энергиясини иссиқлик таъминоти шартномасини тузмасдан етказиб бериш тақиқланади.

Техник шартларни олиш

Истеъмолчи ДХМ ёки ЯИДХП орқали сўровнома юборади. Иссиқлик таъминоти корхонаси QR-кодли техник шартларни 3 иш куни ичида ишлаб чиқади.

Уланиш ёки мавжуд иссиқлик юкламасини оширишнинг техник имконияти мавжуд эмаслиги рад этиш учун асос бўлади. Бошқа асослар бўйича рад этиш тақиқланади.

Лойиҳани ишлаб чиқиш ва келишиш

Истеъмолчи лойиҳа ишларини бажариш учун иссиқлик таъминоти корхонаси ёки бошқа лойиҳалаш ташкилоти билан шартнома тузиши мумкин.

Тайёрланган электрон лойиҳа ДХМ ёки ЯИДХП орқали келишишга юборилади. Иссиқлик таъминоти корхонаси лойиҳани 3 иш куни ичида кўриб чиқиб, QR-кодли хулоса беради.

Лойиҳа техник шартлардан четга чиққан бўлса, келишиш рад этилиши мумкин. Камчиликлар бартараф этилгандан кейин такрорий келишиш 1 иш кунидан ошмаган муддатда амалга оширилади.

Қурилиш ва техник кўрик

Қурилиш-монтаж ва созлаш-ишга тушириш ишлари иссиқлик таъминоти корхонаси ёки бошқа тегишли ташкилот билан тузилган шартнома асосида бажарилади.

Ишлар якунлангандан кейин ДХМ ёки ЯИДХП орқали техник кўрик учун сўровнома юборилади. Сўровнома автоматик равишда Ўзэнергоинспекцияга келиб тушади.

Ўзэнергоинспекция:

объектга чиқиб, ишларнинг техник шарт ва норматив талабларга мувофиқлигини текширади;
тайёрланган иссиқлик-техник ходимлар мавжудлигини ўрганади;
қурилмаларнинг эксплуатацияга тайёрлиги ёки тайёр эмаслиги ҳақида QR-кодли далолатнома расмийлаштиради.

Техник кўрик муддати — 2 иш куни. Камчиликлар бартараф этилгандан кейин қайта кўрик 1 иш куни ичида ўтказилади.

Пломбалаш ва шартнома тузиш

Иссиқлик таъминоти корхонаси сўровнома тушганидан кейин 1 иш куни ичида объектга чиқиб, ҳисобга олиш приборини пломбалайди.

Пломбаланган куннинг ўзида истеъмолчига:

пломбалаш маълумотлари;
расмийлаштирилган иссиқлик таъминоти шартномаси

электрон шаклда юборилади.

Истеъмолчи шартномани 5 иш куни ичида ЭРИ билан тасдиқлайди.

Йиғимлар ва чегирмалар

Давлат хизмати учун:

ДХМ орқали мурожаат қилинганда — БҲМнинг 10 фоизи;
ЯИДХП орқали мурожаат қилинганда — БҲМнинг 9 фоизи ундирилади.

Техник шарт бериш, лойиҳани келишиш, қурилмаларнинг эксплуатацияга тайёрлигини аниқлаш ва ҳисоблагични пломбалаш учун давлат хизмати йиғимидан ташқари алоҳида ҳақ ундирилмайди.

Жисмоний шахслар учун:

Ижтимоий реестрдаги «камбағал оила» аъзолари, давлат тиббиёт муассасаларининг тиббиёт ва фармацевтика ходимлари ҳамда I ва II гуруҳ ногиронлиги бўлган шахсларга — 50 фоиз;
«давлат таъминотидаги оила» аъзоларига — 75 фоиз чегирма берилади.

Норматив ҳужжатлар

Ўзбекистон Республикаси Вазирлар Маҳкамасининг қарори, 31.03.2018 йилдаги 256-сон