Alohida ta’lim ehtiyojlari bo‘lgan bolalarga ta’limni tashkil etish

Qanday ta’lim shakllari mavjud?

Alohida ta’lim ehtiyojlari bo‘lgan bola uchun uning holati va ehtiyojlariga qarab:

umumta’lim maktabidagi inklyuziv ta’lim sinfi;
boshlang‘ich tayanch korrektsion sinf;
alohida ta’lim ehtiyojlari bo‘lgan bolalar uchun ixtisoslashtirilgan maktab yoki maktab-internat;
qonunchilikda nazarda tutilgan boshqa moslashtirilgan ta’lim shakli tavsiya qilinishi mumkin.

Inklyuziv ta’lim sinfi — alohida ta’lim ehtiyojlari bo‘lgan bolalar boshqa bolalar bilan teng huquqli va birgalikda ta’lim oladigan sinf.

Boshlang‘ich tayanch korrektsion sinf — alohida ta’lim ehtiyojlari bo‘lgan bolalar uchun umumta’lim maktabida alohida tashkil etiladigan boshlang‘ich sinf.

Bola qaysi ta’lim shakliga yo‘naltiriladi?

Bolani inklyuziv yoki korrektsion sinfga qabul qilish va undan chiqarish:

psixologik-tibbiy-pedagogik komissiya — PTPK xulosasi;
ota-ona yoki qonuniy vakilning roziligi asosida amalga oshiriladi.

Bolani faqat tashxisi asosida ota-ona roziligisiz muayyan ta’lim muassasasiga majburan joylashtirish mumkin emas.

PTPK — bolaning rivojlanishi, sog‘lig‘i va ta’lim ehtiyojlarini kompleks baholab, unga mos ta’lim shaklini tavsiya qiladigan psixologik-tibbiy-pedagogik komissiya.

PTPK tekshiruvi uchun qaerga murojaat qilinadi?

Qonuniy vakil:

«Inson» ijtimoiy xizmatlar markaziga;
hududga biriktirilgan ijtimoiy xodimga;
Davlat xizmatlari markaziga;
YaIDXP orqali elektron shaklda murojaat qilishi mumkin.

YaIDXP orqali so‘rovnoma dam olish va bayram kunlarida ham 24 soat davomida yuboriladi.

Hujjatlar qanday shakllantiriladi?

So‘rovnoma to‘ldirilgandan keyin bolaga oid zarur ma’lumotlar asosida shaxsiy hujjatlar yig‘majildi shakllantirilib, avtomatik ravishda PTPKga yuboriladi.

Hujjatlari shakllantirilgan bola PTPKning navbatdagi yig‘ilishida tekshiruvdan o‘tkaziladi. Xulosada bola va qonuniy vakil ma’lumotlari, yashash manzili, tavsiya etilayotgan ta’lim muassasasi hamda zarur korrektsion-pedagogik choralar ko‘rsatiladi.

Qabul qachon amalga oshiriladi?

Inklyuziv ta’lim va boshlang‘ich tayanch korrektsion sinflarning 1-sinfiga bolalar, qoida tariqasida, 7 yoshga to‘ladigan yilda qabul qilinadi.

Ta’lim olish huquqini ta’minlash maqsadida umumiy yosh me’yoridan ikki yilga katta bolani ham qabul qilishga ruxsat etiladi. Qabul o‘quv yili boshlangunga qadar yoki o‘quv yili davomida amalga oshirilib, maktab direktorining buyrug‘i bilan rasmiylashtiriladi.

Ta’lim jarayoni qanday tashkil etiladi?

Ta’lim jarayonida:

davlat ta’lim dasturini o‘zlashtirish uchun mos sharoit yaratiladi;
bolaning rivojlanish xususiyatlari va PTPK tavsiyalari hisobga olinadi;
korrektsion-pedagogik mashg‘ulotlar o‘tkaziladi;
ota-onalarga pedagogik va psixologik maslahat beriladi;
bolaning ijtimoiy ko‘nikmalari va jamiyatga integratsiyasi qo‘llab-quvvatlanadi.

Qarordan norozi bo‘lsa nima qilish mumkin?

Qonuniy vakil PTPK xulosasi, bolani qabul qilish yoki ta’lim sharoitlari yuzasidan:

Ijtimoiy himoya milliy agentligining tegishli hududiy boshqarmasiga;
hududiy maktabgacha va maktab ta’limi organiga;
yuqori turuvchi organga yoki sudga murojaat qilishi mumkin.