Qishloq xo‘jaligiga mo‘ljallanmagan er uchastkalarini xususiylashtirish

Endi o‘zingizga tegishli erni xususiylashtirishingiz mumkin: qanday qilib va qancha to‘laysiz?

Xususiylashtirishning mazmuni va shakllari

Qishloq xo‘jaligiga mo‘ljallanmagan er uchastkasini xususiylashtirish — davlat mulkidagi er uchastkasini haq evaziga O‘zbekiston Respublikasi fuqarosi yoki yuridik shaxs mulkiga o‘tkazishdir.

Xususiylashtirish quyidagi shakllarda amalga oshiriladi:

shaxsga doimiy foydalanish, egalik qilish, ijara yoki meros qilib qoldiriladigan umrbod egalik qilish huquqi asosida tegishli er uchastkasini sotib olish;
bo‘sh turgan er uchastkasini elektron onlayn-auktsion orqali sotib olish.

Xususiylashtirish ixtiyoriy va pulli hisoblanadi. Shaxsni er uchastkasini xususiylashtirishga majburlash taqiqlanadi.

Xususiylashtirish ob’ektlari

Quyidagilar xususiylashtirish ob’ekti bo‘lishi mumkin:

yuridik shaxslarga tadbirkorlik, shaharsozlik va qonunchilikda taqiqlanmagan boshqa faoliyat uchun berilgan er uchastkalari;
fuqarolarga yakka tartibda uy-joy qurish va uy-joyni obodonlashtirish, tadbirkorlik yoki shaharsozlik faoliyati uchun berilgan er uchastkalari;
xususiylashtirilishi lozim bo‘lgan davlat ko‘chmas mulk ob’ektlari joylashgan er uchastkalari;
bo‘sh turgan qishloq xo‘jaligiga mo‘ljallanmagan er uchastkalari.

Bo‘sh turgan er uchastkalari elektron onlayn-auktsion orqali xususiylashtiriladi. Davlat ko‘chmas mulk ob’ekti joylashgan er uchastkasi, qoida tariqasida, ushbu ko‘chmas mulk ob’ekti bilan birga xususiylashtiriladi.

Xususiylashtirilmaydigan er uchastkalari

Quyidagi er uchastkalari xususiylashtirilmaydi:

xususiylashtirilmaydigan foydali qazilma konlari yoki davlat mulki ob’ektlari joylashgan erlar;
tabiatni muhofaza qilish, sog‘lomlashtirish, rekreatsiya va tarixiy-madaniy maqsadlarga mo‘ljallangan erlar;
o‘rmon va suv fondi erlari, shahar va shaharchalarning umumiy foydalanishdagi maydonlari, ko‘chalari, yo‘llari, sohil bo‘ylari va xiyobonlari;
shaharsozlik faoliyati cheklangan hududlardagi erlar;
xavfli moddalar bilan zararlangan yoki biogen zaharlanishga duchor bo‘lgan erlar;
maxsus iqtisodiy zona ishtirokchilariga berilgan erlar — zona faoliyat ko‘rsatadigan davrda;
ko‘p kvartirali uylar joylashgan va ularga tutash er uchastkalari;
davlat-xususiy sheriklik yoki ijtimoiy sheriklik loyihalari uchun, shuningdek yuridik shaxslarga jamoat ehtiyojlari uchun berilgan erlar.

Xususiylashtirish sub’ektlari

O‘zbekiston Respublikasi fuqarolari va yuridik shaxslari er uchastkalarini xususiylashtirish sub’ektlari hisoblanadi.

Chet el fuqarolari, fuqaroligi bo‘lmagan shaxslar, chet el yuridik shaxslari, chet el investitsiyalari ishtirokidagi korxonalar, davlat organlari, davlat muassasalari va korxonalari, shuningdek fuqarolarning o‘zini o‘zi boshqarish organlari xususiylashtirish sub’ektlari bo‘lmaydi.

Er uchastkasini xususiylashtirish ixtiyoriydir. Huquq egasini er uchastkasini sotib olishga majburlashga yo‘l qo‘yilmaydi.

Xususiylashtirish tartibi va qiymati

Foydalanishdagi er uchastkasini xususiylashtirish uchun Davlat xizmatlari markazi yoki YaIDXP orqali ariza beriladi. Bo‘sh turgan er uchastkasini sotib olish uchun esa E-auksion elektron savdosida ishtirok etiladi.

Foydalanishdagi er uchastkasining sotib olish qiymati er solig‘ining xususiylashtirish vaqtidagi bazaviy stavkasiga nisbatan belgilangan me’yorlar asosida hisoblanadi. Auktsionga chiqarilgan er uchastkasining yakuniy qiymati elektron savdo natijasiga ko‘ra aniqlanadi.

Xususiylashtirish yakunlangandan keyin er uchastkasiga bo‘lgan mulk huquqi davlat ro‘yxatidan o‘tkaziladi. Mulkdor er uchastkasidan uning ruxsat etilgan foydalanish turiga rioya qilgan holda foydalanishi va uni qonunchilikda belgilangan tartibda tasarruf etishi mumkin.