Qurilishni amalga oshirish va nazorat qilish

Qurilish nazoratining maqsadi

Qurilishni nazorat qilish qurilishga tayyorgarlik ko‘rish, shaharsozlik hujjatlarini ishlab chiqish, qurilish-montaj va ishga tushirish-sozlash ishlarini bajarish hamda ob’ektni foydalanishga qabul qilish jarayonida qonunchilik va shaharsozlik normalariga rioya etilishini ta’minlash maqsadida amalga oshiriladi.

Qurilish ob’ektida quyidagi nazorat turlari ta’minlanishi shart:

qurilish ustidan davlat nazorati;
buyurtmachining texnik nazorati;
loyiha ishlab chiquvchisining mualliflik nazorati;
pudratchining ichki nazorati.

Davlat nazorati

Shaharsozlik sohasidagi davlat nazorati Qurilish va uy-joy kommunal xo‘jaligi vazirligi huzuridagi Qurilish va uy-joy kommunal xo‘jaligi sohasida nazorat qilish inspektsiyasi hamda uning hududiy inspektsiyalari tomonidan amalga oshiriladi.

Inspektsiya va uning hududiy bo‘linmalari:

qurilish-montaj ishlarining tasdiqlangan loyiha hujjatlariga muvofiqligini tekshiradi;
qurilish materiallari, buyumlari va konstruktsiyalarining sifatini nazorat qiladi;
zilzilabardoshlikka ta’sir qiluvchi yoki inson hayoti va sog‘lig‘iga tahdid soluvchi qoidabuzarliklar aniqlanganda ishlarni to‘xtatib turadi;
qoidabuzarliklarni bartaraf etish bo‘yicha majburiy ko‘rsatmalar beradi;
zarur hollarda ob’ektni buzdirish talabi bilan sudga murojaat qiladi.

Qurilish ishlarini boshlash

Vazirlar Mahkamasining 2022-yil 20 apreldagi 200-son qaroriga muvofiq, qurilish-montaj ishlarini boshlash uchun buyurtmachi Davlat xizmatlari markazi yoki Yagona interaktiv davlat xizmatlari portali orqali hududiy inspektsiyaga murojaat qilib, tegishli ruxsatnomani olishi kerak.

Ruxsatnoma olish jarayonida:

qurilish ishtirokchilari haqidagi ma’lumotlar;
loyiha hujjatlari kelishilganligi to‘g‘risidagi xulosa;
ijobiy ekspertiza xulosasining sanasi va raqami;
texnik, mualliflik va ichki nazorat mutaxassislari haqidagi ma’lumotlar;
qurilish laboratoriyasi mavjudligi yoki uni jalb qilish to‘g‘risidagi hujjatlar ko‘rsatiladi.

Qurilish-montaj ishlarini boshlash uchun ruxsatnoma olmasdan qurilish ishlarini amalga oshirish taqiqlanadi. Bu ishlar to‘xtatilishi, javobgarlik choralari qo‘llanilishi yoki ob’ektni buzdirish haqida sudga da’vo kiritilishiga sabab bo‘lishi mumkin.

Texnik, mualliflik va ichki nazorat

Texnik nazorat mutaxassisi qurilish-montaj ishlarining sifati, qo‘llanilayotgan materiallar va konstruktsiyalarning loyiha talablariga muvofiqligini nazorat qiladi.

Mualliflik nazorati mutaxassisi qurilish ishlarining tasdiqlangan loyiha echimlariga muvofiq bajarilishini tekshiradi.

Ichki nazorat pudratchi tomonidan qurilish jarayonida texnologik talablarga va tasdiqlangan hujjatlarga rioya etilishini ta’minlaydi.

Qurilish-montaj ishlarining sifati pudratchining qurilish laboratoriyasi yoki shartnoma asosida jalb etilgan laboratoriya tomonidan tekshiriladi.

Ob’ektni foydalanishga qabul qilish

Qurilishi tugallangan ob’ekt:

tasdiqlangan shaharsozlik hujjatlariga muvofiq to‘liq tayyor bo‘lganda;
ijro hujjatlari mavjud bo‘lganda;
pudratchining muvofiqlik deklaratsiyasi rasmiylashtirilganda;
texnik va mualliflik nazorati mutaxassislarining ijobiy xulosalari mavjud bo‘lganda qabul qilinadi.

Qabul qilish pudratchi va buyurtmachi tomonidan imzolanadigan topshirish-qabul qilish dalolatnomasi bilan rasmiylashtiriladi.

Qurilishi tugallangan ob’ektdan foydalanishga ruxsatnoma ob’ektdan foydalanish hamda unga bo‘lgan huquqni davlat ro‘yxatidan o‘tkazish uchun asos bo‘ladi.