Nodavlat notijorat tashkilotini davlat ro‘yxatidan o‘tkazish

NNTni qayta ro‘yxatdan o‘tkazish muddati qisqartiriladi - Review.uz

NNTni qaysi organ ro‘yxatdan o‘tkazadi?

Nodavlat notijorat tashkilotlarini davlat ro‘yxatidan o‘tkazish adliya organlari tomonidan amalga oshiriladi.

O‘zbekiston Respublikasi Adliya vazirligi:

O‘zbekistonda faoliyat yuritayotgan xalqaro NNTlarni;
bosh tashkiloti O‘zbekistondan tashqarida joylashgan xalqaro NNT va chet el NNTlarining vakolatxonalari va filiallarini;
respublika NNTlarni davlat ro‘yxatidan o‘tkazadi.

Hududiy NNTlar esa Qoraqalpog‘iston Respublikasi Adliya vazirligi, viloyatlar va Toshkent shahar adliya boshqarmalarida ro‘yxatdan o‘tkaziladi.

Hujjatlar qachon taqdim etiladi?

Davlat ro‘yxatidan o‘tkazish haqidagi ariza ta’sis s’ezdi, konferentsiya yoki umumiy yig‘ilish o‘tkazilgan kundan boshlab 2 oy ichida, jamoat birlashmasi uchun esa 1 oy ichida taqdim etiladi.

Hujjatlar qancha vaqtda ko‘rib chiqiladi?

Adliya organi taqdim etilgan hujjatlarni 1 oy ichida ko‘rib chiqib:

davlat ro‘yxatidan o‘tkazish;
yoki davlat ro‘yxatidan o‘tkazishni rad etish haqida qaror qabul qiladi.

Qaror qabul qilinganidan keyin 3 kun ichida muassislarga ro‘yxatdan o‘tkazilganlik haqida guvohnoma yoki rad etishga sabab bo‘lgan qonunchilik talablari aniq ko‘rsatilgan hujjat beriladi.

Ro‘yxatdan o‘tkazilgan NNTga tasdiqlangan ustav, STIR va KTUT kodlari beriladi, tashkilot haqidagi ma’lumotlar tegishli davlat reestriga kiritiladi.

Qaysi holatlarda ro‘yxatdan o‘tkazish rad etilishi mumkin?

Jumladan:

hujjatlar to‘liq taqdim etilmagan yoki lozim darajada rasmiylashtirilmagan bo‘lsa;
hujjatlar belgilangan muddatdan kech topshirilsa;
xuddi shu nomdagi NNT avval ro‘yxatdan o‘tkazilgan bo‘lsa;
NNTni tashkil etish tartibi buzilgan yoki ta’sis hujjatlari qonunchilikka muvofiq bo‘lmasa;
ta’sis hujjatlarida atayin noto‘g‘ri ma’lumotlar berilgan bo‘lsa;
qonunda nazarda tutilgan boshqa taqiq yoki cheklovlar mavjud bo‘lsa davlat ro‘yxatidan o‘tkazish rad etilishi mumkin.

2025-yildan ayrim qo‘shimcha rad etish asoslari ham belgilangan, jumladan ta’sischilar yoki rahbar organi a’zolarining terrorchilik yoki ommaviy qirgin qurolini tarqatish bilan bog‘liq maxsus ro‘yxatlarga kiritilganligi, jamoat fondlarini tashkil etishda esa ayrim mulkiy jinoyatlar uchun tugallanmagan yoki olib tashlanmagan sudlanganlik holati hisobga olinadi.

Rad etilsa nima qilish mumkin?

Rad etish sabablari bartaraf etilgandan keyin hujjatlarni qayta taqdim etish mumkin.

Shuningdek, davlat ro‘yxatidan o‘tkazish rad etilganligi yoki ro‘yxatdan o‘tkazish muddatlari buzilganligi ustidan sudga shikoyat qilish mumkin.

Faqat «NNTni tashkil etish maqsadga muvofiq emas» degan vaj bilan davlat ro‘yxatidan o‘tkazishni rad etishga yo‘l qo‘yilmaydi.