Pochta aloqasi to‘g‘risida

Pochta aloqasi xizmatlari

Pochta aloqasi xizmatlariga xatlar, pochta kartochkalari, banderollar, posilkalar, tezkor pochta jo‘natmalari va pul o‘tkazmalarini qabul qilish, ishlov berish, tashish hamda etkazib berish kiradi.

Universal pochta xizmatlari mamlakat hududida barcha foydalanuvchilar uchun belgilangan sifat talablari va tariflar asosida ko‘rsatiladi.

Foydalanuvchining huquqlari

Foydalanuvchi:

pochta xizmatlari va tariflar haqida to‘liq axborot olish;
jo‘natmani manzil bo‘yicha, talab qilib olish asosida yoki pochtomat orqali qabul qilish;
jo‘natmani olishdan bosh tortish;
xizmatning belgilangan sifatda ko‘rsatilishini talab qilish;
jo‘natma yo‘qolgani, shikastlangani yoki kechikkani uchun zarar qoplanishini talab qilish;
operatorning harakati yoki qarori ustidan shikoyat qilish huquqiga ega.

Foydalanuvchi xizmat haqini to‘lashi, jo‘natmani to‘g‘ri o‘rashi, manzil ma’lumotlarini aniq ko‘rsatishi va jo‘natilishi taqiqlangan buyumlarni yubormasligi shart.

Pochta siri

Yozishmalar, pochta jo‘natmalari, pul o‘tkazmalari, jo‘natuvchi va oluvchining manzili hamda jo‘natma mazmuni pochta siri hisoblanadi.

Muhim: pochta siri qonun bilan kafolatlanadi. Bunday ma’lumotlar faqat qonunchilikda bevosita nazarda tutilgan hollarda va tartibda taqdim etilishi mumkin.

Talabnoma va javobgarlik

Jo‘natma topshirilmagan, kechiktirilgan, yo‘qolgan yoki shikastlangan, shuningdek, pochta pul o‘tkazmasi to‘lanmagan bo‘lsa, foydalanuvchi olti oy ichida yozma talabnoma taqdim etishi mumkin.

Talabnoma:

bir aholi punkti doirasidagi jo‘natma bo‘yicha — besh kun ichida;
boshqa holatlarda — bir oy ichida ko‘rib chiqiladi.

Qiymati e’lon qilingan jo‘natma yo‘qolganda uning e’lon qilingan qiymati va qonunchilikda nazarda tutilgan tovon to‘lanadi. Jo‘natma kechiktirilganda har bir kechikkan kun uchun xizmat haqining bir foizi miqdorida, lekin xizmat haqidan ortiq bo‘lmagan penya qo‘llanilishi mumkin.

Operator engib bo‘lmaydigan kuch, jo‘natmaning tabiiy xususiyatlari yoki bojxona organlarining qonuniy harakatlari oqibatida yuzaga kelgan zarar uchun qonunda belgilangan hollarda javobgar bo‘lmasligi mumkin.

Bu munosabatlar «Pochta aloqasi to‘g‘risida»gi Qonun bilan tartibga solinadi.

Maqola foydali bo‘ldimi?

Bo‘limlar