Yakka tartibda uy-joy qurish yoki rekonstruktsiya qilish loyiha-smeta hujjatlarini kelishish

Loyiha-smeta hujjatlarining tarkibi

Yakka tartibdagi uy-joyni qurish yoki rekonstruktsiya qilish loyihasi, jumladan:

er uchastkasi tarhi;
zarur hollarda er osti va er usti muhandislik kommunikatsiyalari;
poydevor, erto‘la va qavatlar rejalari;
binolarning qirqimlari;
uyning old tomoni va boshqa fasad echimlari kabi arxitektura hujjatlarini qamrab oladi.

Loyiha-smeta hujjatlari qonunchilikda belgilangan hollarda tegishli litsenziyaga ega loyiha tashkiloti tomonidan tayyorlanishi kerak.

Murojaat qilish tartibi

Ariza beruvchi:

Davlat xizmatlari markaziga shaxsan;
YaIDXP orqali elektron shaklda murojaat qiladi.

So‘rovnomaga loyiha-smeta hujjatlarining arxitektura qismi PDF yoki JPEG shaklida ilova qilinadi.

Ob’ekt suvni muhofaza qilish hududiga tutash er uchastkasida qurilayotgan bo‘lsa, suv ob’ektini balansda saqlovchi tashkilotning xulosasi ilova qilinadi. Harbiy ob’ekt yoki rejimli hududga daxldor hollarda tegishli tashkilot xulosasi ham talab etiladi.

Loyiha kelishilmasdan qurilish yoki rekonstruktsiya ishlarini boshlash keyinchalik xizmatni rad etish uchun asos bo‘lishi mumkin.

Loyihani ko‘rib chiquvchi organ

Sokol qavati hisobga olinmagan holda:

ikki qavatdan yuqori bo‘lmagan;
balandligi er yuzasidan 12 metrdan oshmagan;
umumiy maydoni 500 kv. metrdan ortiq bo‘lmagan yakka tartibdagi uy-joy loyihasi faqat vakolatli qurilish organi tomonidan ko‘rib chiqiladi.

Ushbu ko‘rsatkichlardan yuqori ob’ektlar bo‘yicha hujjatlar hududiy arxitektura-shaharsozlik kengashi a’zolariga yuboriladi.

Ko‘rib chiqish muddati

Loyiha faqat vakolatli organ tomonidan ko‘rib chiqilganda xulosa 7 ish kuni ichida beriladi.

Kengash ishtirokida ko‘rib chiqiladigan ob’ektlarda kengash a’zolari 7 ish kunida xulosa beradi. Barcha ijobiy xulosalar olingach, vakolatli organ 5 ish kuni ichida kollegial muhokama o‘tkazib, yakuniy QR-kodli xulosani rasmiylashtiradi.

Xizmat uchun yig‘im

Ob’ektning xavf-xatar toifasiga qarab:

I toifa uchun — BHMning 50 foizi;
II toifa uchun — 1 BHM;
III–IV toifalar uchun — 2 BHM miqdorida yig‘im undiriladi.

Rad etish va qayta murojaat

Rad etishga, jumladan:

so‘rovnomada noto‘g‘ri ma’lumot ko‘rsatilishi;
yig‘im to‘lanmasligi;
loyihaning litsenziyasiz ishlab chiqilishi;
shaharsozlik, sanitariya yoki yong‘in xavfsizligi talablari buzilishi;
loyiha er uchastkasi chegarasidan chiqishi;
muhandislik tarmoqlarining muhofaza zonalari saqlanmasligi;
qurilish ishlari o‘zboshimchalik bilan boshlanganligi asos bo‘ladi.

Rad etishda buzilgan aniq normativ talab ko‘rsatilishi shart. Boshqa asoslar bo‘yicha rad etishga yo‘l qo‘yilmaydi.

Ariza beruvchi rad javobini olganidan keyin 10 kun ichida kamchiliklarni bartaraf etib, yig‘imni qayta to‘lamasdan murojaat qilishi mumkin.

Tartib Vazirlar Mahkamasining 2022-yil 20 apreldagi 200-son qarori bilan belgilangan.