Kadastr pasporti qanday rasmiylashtiriladi

Ko‘chmas mulk ob’ektini kadastr hisobiga olish va kadastr yig‘majildini shakllantirish natijasida turar joy ob’ektiga kadastr pasporti rasmiylashtiriladi.

Kadastr pasportida ob’ektning texnik va kadastr ko‘rsatkichlari aks ettiriladi. Unda mulkdor hamda huquqni belgilovchi hujjatlar haqidagi ma’lumotlar ko‘rsatilmaydi.

Kadastr pasporti elektron va plastik shaklda rasmiylashtiriladi. Qonunchilikda belgilangan hollarda uning qog‘oz shakli ham beriladi.

Kadastr pasporti mulk huquqini tasdiqlovchi hujjat emas. Mulk huquqi davlat reestriga kiritilganidan va reestrdan ko‘chirma olinganidan keyin davlat ro‘yxatidan o‘tgan hisoblanadi.

Kadastr pasporti va davlat ro‘yxatidan o‘tkazish

Kadastr pasportini shakllantirish natijasida ko‘chmas mulkka bo‘lgan huquqni davlat ro‘yxatidan o‘tkazish zarurati yuzaga kelsa, ikki xizmat kompozit xizmat sifatida ko‘rsatiladi.

Belgilangan tartibda kelishilgan loyiha bo‘yicha turar joy qurilishi yoki rekonstruktsiyasi tugallangan bo‘lsa, bitta so‘rovnoma asosida:

• kadastr pasporti;
• ob’ektdan foydalanish uchun ruxsatnoma;
• ko‘chmas mulkka bo‘lgan huquq davlat ro‘yxatidan o‘tkazilgani haqidagi reestrdan ko‘chirma

bir vaqtda berilishi mumkin.

Murojaat qilish tartibi

Ariza beruvchi:

• Davlat xizmatlari markaziga shaxsan;
• Yagona interaktiv davlat xizmatlari portali orqali elektron shaklda

murojaat qiladi.

Davlat xizmatlari markazida so‘rovnomani markaz xodimi ariza beruvchi nomidan to‘ldiradi. Portal orqali murojaat qilinganda so‘rovnoma ariza beruvchi tomonidan mustaqil to‘ldiriladi va uni ERI bilan tasdiqlash talab etilmaydi.

Uchinchi shaxs manfaati uchun murojaat qilinganda belgilangan tartibda rasmiylashtirilgan ishonchnoma ilova qilinadi. Vafot etgan shaxs nomidan uning yaqin qarindoshlari ham murojaat qilishi mumkin.

Taqdim etiladigan hujjatlar

So‘rovnomaga:

• ko‘chmas mulkka bo‘lgan huquqni tasdiqlovchi hujjat;
• yangi qurilgan ob’ekt bo‘yicha tasdiqlangan loyiha hujjatlari

ilova qilinadi.

Ko‘p kvartirali uyning umumiy kadastr pasporti rasmiylashtirilganda qo‘shimcha ravishda loyiha-smeta hujjatlari va uy joylashgan hamda unga tutash er uchastkasi chegaralari ko‘rsatilgan reja-sxema taqdim etiladi.

Reglamentda nazarda tutilmagan qo‘shimcha ma’lumot yoki hujjatlarni talab qilish taqiqlanadi.

Kadastr pasportini tayyorlash muddati

Turar joy ob’ekti bo‘yicha kadastr pasporti:

• ko‘p kvartirali uydagi kvartira uchun — 5 ish kunigacha;
• yakka tartibdagi turar joy uchun — 8 ish kunigacha

tayyorlanadi.

Zarur hollarda kadastr organi ariza beruvchi bilan kelishilgan vaqtda ob’ektga chiqib, texnik inventarizatsiya o‘tkazadi.

Xizmat uchun to‘lov

Vazirlar Mahkamasining 2014-yil 10 iyuldagi 186-son qaroriga muvofiq turar joyga kadastr pasportini tayyorlash qiymati kvartira yoki yakka tartibdagi turar joyning har bir kvadrat metri uchun BHMning 1,15 foizi miqdorida hisoblanadi.

Jismoniy shaxsning turar joyga bo‘lgan huquqini davlat ro‘yxatidan o‘tkazish uchun:

• maydoni 100 kv. metrgacha bo‘lsa — 1,25 BHM;
• 100 kv. metrdan 300 kv. metrgacha bo‘lsa — 2 BHM;
• 300 kv. metrdan ortiq bo‘lsa — 3 BHM

miqdorida yig‘im undiriladi.

YaIDXP orqali murojaat qilinganda belgilangan to‘lovning 90 foizi undiriladi. Invoysdagi to‘lov bir oy ichida amalga oshirilmasa, kadastr pasportini berish rad etiladi va xizmat uchun qayta murojaat qilish talab etiladi.

Bepul rasmiylashtirish holatlari

Birlamchi kadastr pasporti mavjud va ob’ektning texnik ko‘rsatkichlari o‘zgarmagan bo‘lsa, kadastr pasporti, jumladan:

• ob’ekt begonalashtirilganda;
• pasport yo‘qolganda yoki yaroqsiz holga kelganda;
• ob’ektning bir qismi begonalashtirilib, qolgan qismiga pasport berilganda;
• ob’ektning ixtisoslashishi rekonstruktsiyasiz o‘zgartirilganda;
• aholi punktining nomi yoki chegarasi o‘zgarganda bepul rasmiylashtiriladi.

Tartib Vazirlar Mahkamasining 2020-yil 2 sentyabrdagi 535-son qarori bilan belgilangan.