Sayt test rejimida ishlamoqda

Huquqiy axborot - hammaga, har doim, hamma joyda!

  • 4694 marta o'qildi

O‘zbekiston Respublikasida fuqarolik shaxsning davlat bilan o‘zaro huquqlari, majburiyatlari va javobgarligi yig‘indisida ifodalanadigan hamda inson qadr-qimmati, asosiy huquqlari va erkinliklarini e’tirof etish hamda hurmat qilishga asoslanadigan doimiy siyosiy-huquqiy aloqasini belgilaydi.


O‘zbekiston Respublikasining fuqaroligi quyidagi hollarda olinadi
  • tug‘ilganlik bo‘yicha;
  • bola farzandlikka olinganda;
  • O‘zbekiston Respublikasining fuqaroligiga qabul qilish va uni tiklash natijasida.
  • O‘zbekiston Respublikasining fuqaroligi O‘zbekiston Respublikasining xalqaro shartnomalarida va Qonunda nazarda tutilgan boshqa asoslarga ko‘ra ham olinishi mumkin.

Fuqarolikda tenglik
  • O‘zbekiston Respublikasida O‘zbekiston Respublikasining butun hududi uchun yagona fuqarolik o‘rnatiladi. Qoraqalpog‘iston Respublikasining fuqarosi ayni bir vaqtda O‘zbekiston Respublikasining fuqarosi hisoblanadi.
  • O‘zbekiston Respublikasining fuqaroligi, u qanday asoslarda olinganligidan qat’i nazar, hamma uchun tengdir.
  • O‘zbekiston Respublikasi fuqarolari jinsi, irqi, millati, tili, dini, ijtimoiy kelib chiqishi, e’tiqodi, shaxsiy va ijtimoiy mavqeidan qat’i nazar, qonun oldida tengdir.
  • O‘zbekiston Respublikasida har bir inson fuqaro bo‘lish huquqiga egadir. Hech kim O‘zbekiston Respublikasining fuqaroligidan mahrum qilinishi, bundan ushbu Qonunda nazarda tutilgan hollar mustasno, yoki fuqarolikni o‘zgartirish huquqidan mahrum qilinishi mumkin emas.
  • O‘zbekiston Respublikasi o‘z fuqarolarining huquqlari, erkinliklari va qonuniy manfaatlarini himoya qilishni O‘zbekiston Respublikasi hududida hamda uning hududidan tashqarida amalga oshiradi.

Quyidagilar O‘zbekiston Respublikasining fuqarosi hisoblanadi
  • 1992-yil 28-iyulь holatiga ko‘ra O‘zbekiston Respublikasida doimiy yashagan, chet davlat fuqarosi bo‘lmagan va O‘zbekiston Respublikasining fuqarosi bo‘lish istagini bildirgan shaxs;
  • O‘zbekiston hududida yashagan va 1992 yil 28-iyulga qadar o‘qish uchun O‘zbekistondan tashqariga chiqib ketgan hamda uzluksiz ravishda ta’lim olgan yoxud harbiy xizmatni o‘tagan va o‘qish yoki harbiy xizmat tugaganidan keyin 1 yil ichida O‘zbekistonga qaytib kelgan hamda O‘zbekiston Respublikasida doimiy propiskadan o‘tgan shaxs, basharti uning chet davlat fuqaroligi mavjud bo‘lmasa;
  • Qonun kuchga kirgan kunda O‘zbekiston Respublikasining fuqaroligiga ega bo‘lgan shaxs;
  • Qonunga muvofiq O‘zbekiston Respublikasining fuqaroligini olgan shaxs.

O‘zbekiston Respublikasining fuqaroligiga qabul qilish quyidagi hollarda amalga oshiriladi, agar u
  • chet davlat fuqaroligidan chiqishni rasmiylashtirgan bo‘lsa;
  • fuqaroligi bo‘lmagan shaxsga yashash guvohnomasi olingan kundan e’tiboran va O‘zbekiston Respublikasining fuqaroligiga qabul qilish to‘g‘risidagi iltimosnoma bilan murojaat qilgan kunga qadar O‘zbekiston Respublikasi hududida uzluksiz 5 yil davomida doimiy yashab kelayotgan bo‘lsa;
  • tirikchilikning qonuniy manbaiga ega bo‘lsa;
  • O‘zbekiston Respublikasining Konstitutsiyasiga rioya etish majburiyatini o‘z zimmasiga olsa;
  • davlat tilini muloqot qilish uchun zarur darajada bilsa.

Fuqarolikni olish uchun taqdim etiladigan hujjatlar

Xorijiy fuqaro yoki fuqaroligi bo‘lmagan shaxs O‘zbekiston Respublikasi fuqaroligini olish uchun  o‘zi yashab turgan joydagi ichki ishlar organlariga quyidagi hujjatlar bilan murojaat qilishi lozim:

  • O‘zbekiston Respublikasi Prezidenti nomiga ariza. 18 yoshga  to‘lmagan shaxsni O‘zbekiston Respublikasining fuqaroligiga qabul qilish to‘g‘risidagi ariza uning qonuniy vakillari tomonidan bola tug‘ilganligi haqidagi guvohnomaning nusxasi bilan birgalikda beriladi. 14 yoshdan 18 yoshgacha bo‘lgan voyaga etmaganlar ota-onalarining yoki boshqa qonuniy vakillarining arizasiga notarial idoralar tomonidan tasdiqlangan ruxsatnomani taqdim etishlari kerak;
  • 2 nusxada ariza-so‘rovnoma;
  • xorijiy fuqarolikdan chiqqanlikni tasdiqlovchi hujjat;
  • 2 nusxada tarjimai hol;
  • kun kechirishning qonuniy manbalari mavjudligini tasdiqlovchi hujjat (ish joyidan ma’lumotnoma yoki ish haqi, pensiya, nafaqa, dividentlar va kun kechirishning boshqa manbalari ko‘rsatilgan boshqa hujjat);
  • 4 ta fotosurat (35x45mm);
  • 2 nusxada oilasining tarkibi to‘g‘risida turar joyidan ma’lumotnoma;
  • davlat boji to‘langanligi haqidagi hujjat BHMning 2 baravari.

Fuqarolik masalalari bo‘yicha arizalarni rasmiylashtiruvchi ichki ishlar organlari, diplomatiya vakolatxonalari, konsullik muassasalari ariza beruvchi shaxsdan ko‘rsatilgan hujjatlar va materiallardan tashqari ishga daxldor bo‘lgan boshqa hujjatlarni ham talab qilishga haqlidirlar.


  • Arizalar, so‘rovnomalar va tarjimai hollarning barcha nusxalarini arizachi ular yozilgan sanani ko‘rsatib imzolashi zarur.
  • Arizachi savodsizligi yoki jismoniy kamchiliklari tufayli arizaga o‘z qo‘li bilan imzo cheka olmagan taqdirda,  uning iltimosiga ko‘ra, arizaga boshqa shaxs imzo chekishi mumkin va konsullik arizachi o‘z qo‘li bilan arizani imzolay olmaganligi sabablarini arizaga yozib qo‘yadi.
  • Arizachi barcha hujjatlarni topshirgan paytdan boshlab taqdimnoma ijro uchun qabul qilingan deb hisoblanadi.
  • O‘zbekiston Respublikasi Prezidenti farmoni e’lon qilingan kundan boshlab fuqarolikka olinadi.
  • Materiallarni ko‘rib chiqish muddati hujjatlar ariza berilgan paytdan boshlab 1 yildan oshmasligi kerak.


O‘zbekiston Respublikasining fuqaroligi masalalariga oid materiallarni ko‘rib chiqishni tugatish asoslari.

Chat