Bolalarning O‘zbekiston fuqaroligi

Bola qachon tug‘ilganlik bo‘yicha O‘zbekiston fuqaroligini oladi?

Bola tug‘ilgan joyidan qat’i nazar O‘zbekiston fuqaroligini oladi, agar tug‘ilgan paytda:

ota-onasining har ikkisi yoki yolg‘iz otasi yoxud onasi O‘zbekiston fuqarosi bo‘lsa;
ota-onasidan biri O‘zbekiston fuqarosi, ikkinchisi fuqaroligi bo‘lmagan shaxs bo‘lsa;
ota-onasidan biri O‘zbekiston fuqarosi, ikkinchisi chet davlat fuqarosi bo‘lsa;
ota-onasidan biri O‘zbekiston fuqarosi, ikkinchisi bedarak yo‘qolgan deb topilgan yoki uning turgan joyi noma’lum bo‘lsa.

O‘zbekiston hududida tug‘ilgan, ota-onasi fuqaroligi bo‘lmagan shaxslar bo‘lgan bola ham O‘zbekiston fuqaroligini oladi.

O‘zbekiston hududida turgan va ota-onasi noma’lum bo‘lgan bola O‘zbekiston fuqarosi hisoblanadi.

Bola — 18 yoshga to‘lmagan shaxs.

Tug‘ilganlik bo‘yicha fuqarolik — bolaning ota-onasi fuqaroligi va qonunda belgilangan boshqa holatlar asosida fuqarolik olishi.

Fuqaroligi bo‘lmagan shaxs — biror davlat fuqaroligiga mansubligini tasdiqlovchi dalilga ega bo‘lmagan shaxs.

Bolaning fuqaroligini qaysi hujjat tasdiqlaydi?

16 yoshga to‘lmagan bolaning O‘zbekiston fuqaroligini:

tug‘ilganlik haqidagi guvohnoma yoki ma’lumotnoma;
ota-onasidan birining O‘zbekiston fuqaroligini tasdiqlovchi pasporti, ID-kartasi yoki boshqa hujjati tasdiqlaydi.

Agar bola O‘zbekistonda tug‘ilgan va ota-onasi fuqaroligi bo‘lmagan shaxslar bo‘lsa, ularning O‘zbekistonda yashash huquqini tasdiqlovchi hujjatlari ham ko‘rsatiladi.

Ota-ona fuqaroligi o‘zgarsa nima bo‘ladi?

14 yoshga to‘lmagan bolaning ota-onasi yoki yolg‘iz otasi yoxud onasi O‘zbekiston fuqaroligini olsa yoki undan chiqsa, bolaning fuqaroligi ham o‘zgarishi mumkin.

Agar ota-onadan biri O‘zbekiston fuqaroligini olsa:

ikkinchi ota-ona chet davlat fuqarosi bo‘lsa, bola fuqarolik olayotgan ota yoki onaning iltimosnomasi asosida O‘zbekiston fuqaroligini olishi mumkin;
ikkinchi ota-ona fuqaroligi bo‘lmagan shaxs bo‘lsa, O‘zbekistonda yashayotgan bola O‘zbekiston fuqaroligini oladi.

Agar ota-onadan biri O‘zbekiston fuqaroligidan chiqsa, ikkinchisi esa O‘zbekiston fuqarosi bo‘lib qolsa, bola O‘zbekiston fuqaroligini saqlab qoladi.

Muhim: bola fuqaroligi o‘zgarishi natijasida fuqaroligi bo‘lmagan shaxs bo‘lib qolishiga yo‘l qo‘yilmaydi.

Bola farzandlikka olinsa

Chet davlat fuqarosi yoki fuqaroligi bo‘lmagan bola:

O‘zbekiston fuqarolari tomonidan farzandlikka olinsa;
biri O‘zbekiston fuqarosi, ikkinchisi fuqaroligi bo‘lmagan shaxs bo‘lgan er-xotin tomonidan farzandlikka olinsa,

O‘zbekiston fuqaroligini oladi.

Agar farzandlikka oluvchilardan biri O‘zbekiston fuqarosi, ikkinchisi chet davlat fuqarosi bo‘lsa, bola ularning o‘zaro kelishuviga ko‘ra O‘zbekiston fuqaroligini oladi.

Bolaning roziligi qachon kerak?

Ota-onasining fuqaroligi o‘zgarganda yoki bola farzandlikka olinganda 14 yoshdan 18 yoshgacha bo‘lgan bolaning fuqaroligi faqat uning yozma roziligi bilan o‘zgartiriladi.

Ota-onalik huquqidan mahrum etilgan ota yoki onaning fuqaroligi o‘zgarishi bolaning fuqaroligiga ta’sir qilmaydi. Bunday ota-onaning roziligi ham talab qilinmaydi.

Normativ hujjatlar

«O‘zbekiston Respublikasining fuqaroligi to‘g‘risida»gi Qonun

O‘zbekiston Respublikasining fuqaroligi masalalarini ko‘rib chiqish tartibi to‘g‘risidagi nizom