Чет эл фуқароларини вақтинча ва доимий рўйхатга олиш

Вақтинча рўйхатга олиш нима?

Вақтинча рўйхатга олиш — чет эл фуқароси ёки фуқаролиги бўлмаган шахснинг Ўзбекистонда муайян манзилда вақтинча турганлигини расмий қайд этиш.

Чет эл фуқароси Ўзбекистонга киргандан кейин ўзининг турган жойи бўйича белгиланган тартибда рўйхатга олиниши керак.

Вақтинча рўйхатга олиш:

ички ишлар органларининг миграция ва фуқароликни расмийлаштириш бўлинмалари;
меҳмонхона ва бошқа жойлаштириш воситалари;
даволаш муассасалари;
қонунчиликда белгиланган бошқа масъул шахслар орқали амалга оширилади.

Меҳмонхонада турган шахсни ким рўйхатга олади?

Меҳмонхона, хостел, дам олиш маскани, санаторий ёки бошқа жойлаштириш воситасида турган чет эл фуқаросини рўйхатга олишни жойлаштириш воситаси маъмурияти амалга оширади.

Маълумотлар «E-mehmon» электрон дастурига киритилади. Меҳмондан рўйхатга олишни мустақил равишда ички ишлар органида расмийлаштириш талаб этилмайди.

Хусусий уй-жойда турган шахс қандай рўйхатга олинади?

Чет эл фуқароси қариндоши, таниши ёки ижарага олинган хусусий уй-жойда турса, уни таклиф қилган ёки қабул қилган шахс рўйхатга олишни таъминлайди.

Бўлиш муддати:

30 кундан ошмаса — жойлашган пайтда «E-mehmon» дастури орқали ёки уч иш куни ичида миграция бўлинмасига мурожаат қилиш орқали;
30 кундан ошса — уч иш куни ичида ҳудудий миграция бўлинмасига мурожаат қилиш орқали расмийлаштирилади.

Мустақил саёҳат қилувчилар қандай рўйхатдан ўтади?

Палаткали лагерда ёки тунаш учун мослаштирилган транспорт воситасида яшаётган мустақил сайёҳ келганидан кейин уч иш куни ичида туристик-ахборот маркази ёки яқин жойлаштириш воситаси орқали «E-mehmon» тизимида рўйхатдан ўтиши керак.

Рўйхатга олиш учун тўлов ундириладими?

30 кунгача вақтинча рўйхатга олишда туристик йиғим ундирилиши мумкин.

30 кундан ортиқ муддатга вақтинча рўйхатга олиш учун давлат божи қонунчиликда белгиланган миқдорда тўланади.

Доимий рўйхатга олиш нима?

Доимий рўйхатга олиш — Ўзбекистонда доимий яшаш ҳуқуқига эга шахснинг доимий яшаш манзилини расмий қайд этиш.

Доимий рўйхатга олиш учун чет эл фуқароси ёки фуқаролиги бўлмаган шахсда:

Ўзбекистонда доимий яшашга рухсат;
яшаш гувоҳномаси ёки чет эл фуқароси учун идентификация ID-картаси;
турар жойдан фойдаланиш ҳуқуқини тасдиқловчи асос мавжуд бўлиши керак.

Доимий рўйхатга олиш ички ишлар органларининг миграция ва фуқароликни расмийлаштириш бўлинмалари томонидан амалга оширилади.

Рўйхатга олинганлик қандай тасдиқланади?

Маълумотлар электрон ахборот тизимига киритилади. Шахснинг сўровига кўра унга QR-код билан ҳимояланган қайд варағи берилиши мумкин.

Манзил ўзгарса нима қилиш керак?

Чет эл фуқароси вақтинча турган ёки доимий яшаш манзилини ўзгартирса, янги манзил бўйича қайта рўйхатга олиниши керак.

Виза, яшаш гувоҳномаси ёки ID-картанинг мавжудлиги шахсни турган жойи бўйича рўйхатга олиш мажбуриятидан автоматик равишда озод қилмайди.

Рўйхатдан ўтмасдан яшашнинг оқибати

Рўйхатга олиш қоидаларини бузган чет эл фуқароси, уни қабул қилган шахс ёки жойлаштириш воситасининг масъул ходими қонунчиликда белгиланган жавобгарликка тортилиши мумкин.

Норматив ҳужжатлар

Вазирлар Маҳкамасининг 2020 йил 28 сентябрдаги 593-сон қарори

«Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида»ги Қонун