Жамоат транспортидан фойдаланиш қоидаларини бузганлик учун жарималар

Жамоат транспортида тамаки чекиш

Автобус, такси, йўналишли такси, метрополитен ва шаҳар электр транспортида тамаки маҳсулотини истеъмол қилиш тақиқланади.

Ушбу ҳуқуқбузарлик учун БҲМнинг учдан бир қисми миқдорида жарима солинади.

Транспортдан чиқинди ташлаш

Поезд вагони, автотранспорт воситаси, шаҳар йўловчилар транспорти ёки сув транспортидан ахлат ёки бошқа нарсаларни ташлаб юбориш:

1 БҲМ миқдорида жарима солишга сабаб бўлади.

Муҳим: мазкур жарима автобус, енгил автомобиль ва бошқа автотранспорт воситасидан йўлга ёки атрофга чиқинди ташланган ҳолатларга ҳам татбиқ этилади.

Багаж ҳақини тўламаслик

Троллейбус, трамвай, шаҳар ичидаги ёки шаҳар атрофига қатнайдиган автобус ва йўналишли таксида тўлов талаб қилинадиган багажни ҳақ тўламасдан олиб юриш:

ҳар бир багаж жойи учун БҲМнинг ўндан бир қисми миқдорида жарима солишга сабаб бўлади.

Жарима тўлангани йўловчини багаж ташиш ҳақини тўлашдан озод қилмайди.

Шаҳарлараро автобусда чиптасиз юриш

Шаҳарлараро қатнайдиган автобусда чиптасиз юриш учун:

1 БҲМ миқдорида жарима солинади.

Шаҳар ва шаҳар атрофи транспортида чиптасиз юриш

Йўловчининг:

троллейбусда;
трамвайда;
шаҳар ичидаги автобусда;
шаҳар атрофига қатнайдиган автобусда чиптасиз юриши:

БҲМнинг ўндан бир қисми миқдорида жарима солишга сабаб бўлади.

Жарима йўл ҳақининг ўрнини босмайди

Йўловчига жарима солинганда унга ундирилган сумма кўрсатилган квитанция ёки электрон тўлов тасдиғи берилиши керак.

Муҳим: жаримани тўлаш йўловчини йўл чиптасини сотиб олиш ёки багаж ҳақини тўлаш мажбуриятидан озод қилмайди.

Жарима тўғрисидаги қарорга норози бўлган шахс унинг устидан қонунчиликда белгиланган маъмурий ёки суд тартибида шикоят қилиш ҳуқуқига эга.

Жавобгарлик чоралари Ўзбекистон Республикасининг Маъмурий жавобгарлик тўғрисидаги кодексининг 56¹, 123, 143 ва 144-моддаларида белгиланган.