Магистратурага ҳужжат топшириш ва қабул тартиби

Магистратурага қабул бўйича турдош олий таълим йўналишларининг рўйхати тасдиқланди

Ариза бериш муддати

Магистратурага ҳужжатлар ҳар йили 1 июлдан 30 июлгача, шу жумладан 30 июль куни ҳам, электрон шаклда қабул қилинади.

Ариза:

Олий таълим, фан ва инновациялар вазирлигининг махсус электрон платформаси;
Ягона интерактив давлат хизматлари портали орқали берилади.

Абитуриент фақат тамомлаган бакалавриат йўналишига мос ёки турдош магистратура мутахассислигига ҳужжат топшириши мумкин. Турдош йўналишлар рўйхати ҳар йили вазирлик томонидан тасдиқланади.

Электрон ҳужжатлар

Рўйхатдан ўтишда:

бакалавр дипломи ва унинг иловаси;
белгиланган даражадаги миллий ёки халқаро тил сертификати;
мавжуд бўлса, имтиёзни тасдиқловчи ҳужжат юкланади.

2020/2021 ўқув йилидан бошлаб Ўзбекистон олий таълим ташкилотлари томонидан берилган диплом маълумотлари ўртача бали билан HEMIS тизимида мавжуд бўлса, диплом ва унинг иловасини қайта юклаш талаб этилмайди.

Хорижий тил сертификати

Магистратурага қабулда қуйидаги даражадаги сертификат талаб қилинади:

хорижий тиллар йўналишлари учун — камида C1;
гуманитар, биологик ва турдош фанлар, математика ва статистика, бизнес ва бошқарув, ҳуқуқ, хизмат кўрсатиш, ижтимоий ва хулқ-атвор фанлари, журналистика ва ахборот ҳамда ахборот-коммуникация технологиялари учун — камида B2;
бошқа таълим соҳалари, маданият ва спорт мутахассисликлари учун — камида B1.

Кўриш, эшитиш ва нутқидаги нуқсони бўйича I ёки II гуруҳ ногиронлиги бўлган шахслардан тил сертификати талаб этилмайди.

Муҳим: талаб қилинадиган сертификат даражаси танланган магистратура мутахассислигининг таълим соҳасига боғлиқ. Сертификат даражаси етарли бўлмаса, ариза қабул қилинмайди.

Ҳужжатларни кўриб чиқиш

Қабул комиссияси аризаларни ҳар йили 10 августгача кўриб чиқади.

Аризанинг қабул қилингани ёки рад этилгани, рад этилганда эса унинг сабаби шахсий кабинетда кўрсатилади. Абитуриент ариза ҳолатини электрон платформа орқали кузатиб боради.

Танлов тартиби

Магистратурага қабул алоҳида кириш имтиҳонисиз, абитуриентларнинг бакалавриат дипломидаги ўртача баллари кетма-кетлиги асосида амалга оширилади.

Танлов:

ҳар бир олий таълим ташкилоти;
магистратура мутахассислиги;
ўқитиш тили;
таълим шакли бўйича алоҳида ўтказилади.

Диплом бўйича энг юқори ўртача баллга эга абитуриентлар биринчи навбатда давлат грантига, кейинги абитуриентлар эса рейтинг асосида тўлов-контрактга тавсия этилади.

Қабул тўғрисидаги Давлат комиссияси қарори ҳар йили 25 августгача қабул қилинади.