Автомобилда газ баллонларидан фойдаланиш юзасидан тавсиялар

Газ ускунасини ўрнатиш

Автомобилга газ баллони ва тегишли ускуналарни ўрнатиш транспорт воситасини қайта жиҳозлаш ҳисобланади. Ишлар тегишли талабларга жавоб берадиган мутахассис ёки ташкилот томонидан амалга оширилиши керак.

Қўлбола баллон, вентиль, қувур, хавфсизлик клапани ёки маҳкамлаш мосламаларидан фойдаланиш мумкин эмас. Ўрнатилган ускуна транспорт воситасининг ҳужжатларида белгиланган тартибда акс эттирилиши лозим.

Техник ҳолат ва даврий синов

Газ баллонининг:

ишлаб чиқарилган санаси;
фойдаланиш муддати;
завод рақами;
ишчи ва синов босими;
охирги ва навбатдаги синов санаси кўрсатилган тамғаси ёки паспорти текширилади.

Баллоннинг навбатдаги синов муддати унинг паспорти, маркировкаси, ишлаб чиқарувчи талаби ва татбиқ этиладиган техник нормативлар асосида белгиланади. Синов фақат бундай ишларни бажариш ҳуқуқига эга ташкилотда ўтказилиши керак.

Фойдаланиш муддати ўтган, навбатдаги синовдан ўтмаган, шикастланган ёки ҳужжатлари мавжуд бўлмаган баллонга газ тўлдириш ва ундан фойдаланиш мумкин эмас.

Хавфсиз фойдаланиш

Ҳайдовчи мунтазам равишда уланишларнинг зичлигини, вентиллар, қувурлар, маҳкамлаш белбоғлари ва хавфсизлик клапанларини текшириши лозим.

Газ ҳиди сезилса:

двигателни ўчириш;
очиқ оловдан фойдаланмаслик ва чекмаслик;
электр ускуналарини ёқиб-ўчирмаслик;
одамларни хавфсиз масофага олиб чиқиш;
ихтисослашган хизматга мурожаат қилиш керак.

Баллоннинг металл қисмларга ишқаланиши, зарба олиши, коррозияга учраши ёки меъёрдан ортиқ тўлдирилишига йўл қўйилмайди.

Жавобгарлик

Газда ишлайдиган транспорт воситасидан фойдаланишда хавфсизлик қоидаларини бузиш фуқароларга 5 БҲМ, мансабдор шахсларга 10 БҲМ миқдорида жарима солинишига сабаб бўлади.

Қоидабузарлик одамга ўртача оғир ёки оғир шикаст етказилишига, одам ўлимига ёки бошқа оғир оқибатларга сабаб бўлса, жиноий жавобгарлик келиб чиқади.