Далолатнома ёзувларини тиклаш

Далолатнома ёзувини тиклаш нима?

Далолатнома ёзувини тиклаш — илгари туғилганлик, никоҳ тузилганлиги, никоҳдан ажралганлик ёки бошқа фуқаролик ҳолати ҳақида ёзув мавжуд бўлганини тасдиқловчи етарли асослар бўлганда йўқолган ёзувни қайта тиклашдир.

Муҳим: гувоҳнома йўқолган, лекин ФҲДЁ тизимида далолатнома ёзуви сақланган бўлса, ёзувни тиклаш эмас, такрорий гувоҳнома олиш талаб этилади.

Ким мурожаат қилиши мумкин?

Туғилганлик, никоҳ тузилганлиги ва никоҳдан ажралганлик ҳақидаги ёзувни тиклаш учун, одатда, ёзув кимга нисбатан тузилган бўлса, ўша шахснинг ўзи мурожаат қилади.

16 ёшга тўлмаган болага нисбатан унинг:

ота-онаси;
васийси ёки ҳомийси;
бола жойлаштирилган тегишли муассаса вакили мурожаат қилиши мумкин.

Далолатнома ёзувининг иккала нусхаси ҳам йўқолган бўлса, 16 ёшга тўлган фуқаро ФҲДЁ органига шахсан ариза беради.

Аризага илова қилинадиган маълумотлар

Ариза билан бирга:

ариза берувчининг паспорти ёки ID-картаси нусхаси;
тикланиши сўралаётган ёзувга тааллуқли шахслар ҳақидаги маълумотлар;
ёзув аввал мавжуд бўлганини тасдиқловчи ҳужжатлар, агар улар ариза берувчида бўлса;
масалани ҳал қилиш учун аҳамиятли бошқа ҳужжатлар тақдим этилиши мумкин.

ФҲДЁнинг ягона электрон архиви ва идоралараро ахборот тизимларида мавжуд маълумотлар ариза берувчидан қайта талаб қилинмайди.

Кўриб чиқиш муддати

Ариза ФҲДЁ органи томонидан 15 кун мобайнида кўриб чиқилади. Зарур тасдиқловчи маълумотларни олиш билан боғлиқ узрли сабаблар мавжуд бўлса, муддат кўпи билан 15 кунга узайтирилиши мумкин. Бу ҳақда ариза берувчига хабар берилади.

Ёзувни тиклаш учун етарли асослар аниқланмаса, ФҲДЁ органи асослантирилган рад жавоби беради. Рад этиш устидан судга мурожаат қилиш мумкин.

Хизмат учун қонунчиликда белгиланган тартибда давлат божи ундирилади.