Никоҳдан ажратиш тартиби

Никоҳни бекор қилиш тўғрисида судга даъво ариза берилганда давлат божи кимдан ундирилади?

Никоҳ қайси тартибда бекор қилинади?

Никоҳдан ажратиш ҳолатга қараб ФҲДЁ органида ёки суд тартибида амалга оширилади.

Эр-хотин ўзаро рози бўлса, уларнинг вояга етмаган умумий фарзандлари бўлмаса ва ўртада мол-мулк ёки таъминот бўйича низо мавжуд бўлмаса, никоҳ ФҲДЁ органида бекор қилиниши мумкин. Агар хотин ҳомиладор бўлса, ўзаро розилик асосида ФҲДЁ орқали никоҳдан ажратиш ҳақидаги ариза қабул қилинмайди.

Бундан ташқари, турмуш ўртоқлардан бири суд томонидан бедарак йўқолган ёки муомалага лаёқатсиз деб топилган ёхуд камида 3 йилга озодликдан маҳрум қилинган бўлса, қонунда белгиланган шартларда иккинчи томоннинг аризаси асосида ФҲДЁ орқали никоҳдан ажратиш мумкин.

Қачон судга мурожаат қилинади?

Қуйидаги ҳолатларда никоҳдан ажратиш, қоида тариқасида, суд тартибида амалга оширилади:

эр-хотиннинг вояга етмаган умумий фарзандлари бўлса;
турмуш ўртоқлардан бири никоҳдан ажратишга рози бўлмаса;
болалар ким билан яшаши ёки уларнинг таъминоти бўйича низо мавжуд бўлса;
эр-хотиннинг умумий мол-мулкини бўлиш бўйича низо бўлса;
муҳтож ва меҳнатга лаёқатсиз эр ёки хотинга таъминот бериш масаласида низо бўлса.

Суд эр-хотиннинг кейинги биргаликда яшаши ва оилани сақлаб қолиши мумкин эмас деб топса, никоҳдан ажратиш тўғрисида қарор қабул қилади.

Ярашиш учун муҳлат бериладими?

Суд ишни кўришни кейинга қолдириб, эр-хотинга ярашиш учун 6 ойгача муҳлат бериши мумкин.

Оилавий (маиший) зўравонликдан жабрланган шахс талаб қилса, суд ярашиш учун муҳлат тайинламайди.

Шунингдек, эр хотинининг розилигисиз унинг ҳомиладорлиги вақтида ва бола туғилганидан кейин 1 йил мобайнида никоҳдан ажратиш ҳақида иш қўзғатишга ҳақли эмас.

ФҲДЁга электрон мурожаат қилиш мумкинми?

Ўзбекистон ФҲДЁ органларида қайд этилган никоҳ бўйича тегишли ҳолатларда Ягона интерактив давлат хизматлари портали орқали электрон ариза бериш мумкин.

Эр ва хотиннинг розилиги Face-ID ёки MyID орқали тасдиқланади. Ўзаро розилик асосида ФҲДЁ орқали никоҳдан ажратиш аризаси берилганда никоҳ ариза берилган кундан 3 ой ўтгач қайд этилади.

Никоҳ қачон тугаган ҳисобланади?

Суд никоҳдан ажратиш тўғрисида ҳал қилув қарори чиқарган бўлса ҳам, никоҳ автоматик равишда шу куни тугамайди.

Никоҳ ФҲДЁ органида никоҳдан ажратиш қайд этилган кундан бошлаб тугатилган ҳисобланади.

Суд қарори қонуний кучга киргач, эр ёки хотиндан бири, шунингдек ишончнома асосидаги вакил ФҲДЁ органига мурожаат қилиши мумкин. Электрон мурожаат қилинганда ФҲДЁ хабар юборганидан кейин суд қарорининг асл нусхаси 5 иш куни ичида тақдим этилиши керак.