Вақтинча меҳнатга лаёқатсизлик нафақасини ҳисоблашдаги чегаралар

Нафақани ҳисоблашда қайси иш ҳақи инобатга олинади?

Вақтинча меҳнатга лаёқатсизлик нафақаси суғурталанган шахснинг ўртача ойлик иш ҳақи асосида ҳисобланади.

Ўртача ойлик иш ҳақи — нафақа тайинланадиган ойдан олдинги ҳисоб-китоб давридаги меҳнатга ҳақ тўлаш тарзидаги даромадлар асосида аниқланадиган миқдор.

Ўртача ойлик иш ҳақи:

нафақа тайинланадиган ойдан олдинги суғурта стажига кирувчи 12 ойлик иш ҳақини 12 га бўлиш орқали;
суғурта стажи 12 ойдан кам бўлса, мавжуд ойлардаги иш ҳақини шу ойлар сонига бўлиш орқали аниқланади.

Мажбурий суғурталанган шахснинг солиқ солинадиган ва суғурта ажратмалари ҳисобланадиган барча меҳнат даромадлари инобатга олинади.

Ҳисобга олинадиган иш ҳақининг энг юқори чегараси

Нафақани ҳисоблашда суғурталанган шахснинг ўртача ойлик иш ҳақининг меҳнатга ҳақ тўлашнинг энг кам миқдорининг 10 бараваридан ошмаган қисми ҳисобга олинади.

Жамоа келишуви, жамоа шартномаси ёки ташкилотнинг ички ҳужжатларида ходимга қўшимча тўловлар назарда тутилиши мумкин.

Суғурта стажига қараб қандай чегара қўлланилади?

Нафақа миқдори ўртача ойлик иш ҳақининг:

6 ойдан 96 ойгача суғурта стажида — 60 фоизи;
97 ой ва ундан ортиқ суғурта стажида — 80 фоизи миқдорида ҳисобланади.

Айрим ижтимоий тоифалар учун мазкур коэффициент 20 фоиз бандга оширилади, лекин умумий ҳисоблашда белгиланган чегаралар сақланади.

Узоқ давом этган касалликда миқдор ўзгарадими?

Календарь йил давомида расмийлаштирилган меҳнатга лаёқатсизлик варақалари бўйича умумий давр 77 календарь кундан ошса, 77 кундан кейинги давр учун стаж коэффициенти 10 фоиз бандга камайтирилади.

Ушбу камайтириш ҳомиладорлик ва туғиш билан боғлиқ даврларга татбиқ этилмайди.

Нафақа қанча муддат тўланади?

Вақтинча меҳнатга лаёқатсизлик нафақаси меҳнатга лаёқатсизлик варақасида кўрсатилган давр учун, бироқ бир календарь йилда, қоида тариқасида, 182 календарь кундан ошмаган муддатга тўланади.

Касалланган болани парваришлаш учун варақа очилганда тўлов даври:

14 ёшгача бўлган бола учун — қўшимча 20 календарь кунга;
ногиронлиги бўлган 16 ёшгача бола учун — қўшимча 40 календарь кунга узайтирилади.

Қайси даврларда нафақа тўланмайди?

Вақтинча меҳнатга лаёқатсизлик қуйидаги даврларга тўғри келса, ушбу давр учун нафақа тўланмайди:

иш ҳақи сақланмайдиган таътил;
иш ҳақи қисман сақланадиган таътил;
болани парваришлаш таътили;
ҳарбий ўқув ёки текширув йиғини;
ишлаб чиқаришдан ажралмаган ҳолдаги ўқув таътили.

Агар меҳнатга лаёқатсизлик ушбу даврдан кейин ҳам давом этса, нафақа ходим ишга чиқиши керак бўлган кундан бошлаб тўланади.

Норматив ҳужжатлар

«Давлат ижтимоий суғуртаси тўғрисида»ги Қонун

Вазирлар Маҳкамасининг 2025 йил 17 декабрдаги 796-сон қарори