Давлат ижтимоий суғуртаси бўйича тўланадиган нафақалар

Давлат ижтимоий суғуртаси бўйича қандай нафақалар тўланади?

Давлат ижтимоий суғуртаси доирасида суғурталанган шахсларга:

ҳомиладорлик ва туғиш нафақаси;
вақтинча меҳнатга лаёқатсизлик нафақаси тўланади.

Суғурталанган шахс — давлат ижтимоий суғуртаси бўйича суғурта ҳодисаларидан ҳимояланган жисмоний шахс.

Суғурта стажи — шахс учун давлат ижтимоий суғурта бадаллари тўланган даврлар йиғиндиси.

Меҳнатга лаёқатсизлик варақаси — шахсни ишдан озод қилиш ва тегишли нафақани тайинлаш учун асос бўладиган тиббий ҳужжат.

Нафақалар қачондан янги тартибда тўланади?

Янги давлат ижтимоий суғуртаси тизими:

2026 йил 1 январдан юзага келган ҳомиладорлик ва туғиш ҳолатларига;
2026 йил 1 июлдан юзага келган вақтинча меҳнатга лаёқатсизлик ҳолатларига нисбатан қўлланилади.

Суғурта ҳодисаси юзага келган сана меҳнатга лаёқатсизлик варақасида кўрсатилган ишдан озод этиш даврининг биринчи куни ҳисобланади.

Нафақа қандай тайинланади?

Нафақа фуқаронинг алоҳида аризасисиз, электрон меҳнатга лаёқатсизлик варақаси ва давлат ахборот тизимларидаги маълумотлар асосида проактив шаклда тайинланади.

Проактив тайинлаш — фуқародан алоҳида ариза ёки қоғоз ҳужжат талаб қилмасдан, электрон маълумотлар асосида нафақа тайинлаш.

Нафақа тайинлангани, унинг миқдори, тўлов муддати ёки рад этиш сабаби ҳақида фуқарога СМС-хабар ёки электрон хабарнома юборилади.

Тўлов Давлат ижтимоий суғурта жамғармаси маблағлари ҳисобидан фуқаронинг ижтимоий картаси ёки банк картасига ўтказилади.

Ҳомиладорлик ва туғиш нафақаси

Ҳомиладорлик ва туғиш таътили:

туғруққача 70 календарь кун;
туғруқдан кейин 56 календарь кун;
туғиш қийин кечганда ёки икки ва ундан ортиқ бола туғилганда туғруқдан кейин 70 календарь кун давом этади.

Ҳомиладорлик ва туғиш нафақасини олиш учун камида 10 ой суғурта стажи, шунингдек, суғурта ҳодисасидан олдинги охирги 6 ойда узлуксиз суғурта стажи талаб қилинади. Қонунчиликда белгиланган айрим истиснолар бундан мустасно.

Вақтинча меҳнатга лаёқатсизлик нафақаси

Вақтинча меҳнатга лаёқатсизлик нафақасини олиш учун камида 6 ой суғурта стажи бўлиши керак.

Нафақани ҳисоблашда ўртача ойлик иш ҳақига:

6 ойдан 96 ойгача суғурта стажи бўлганда — 60 фоиз;
97 ой ва ундан ортиқ суғурта стажи бўлганда — 80 фоиз коэффициент қўлланилади.

I ёки II гуруҳ ногиронлиги бўлган, қарамоғида 18 ёшга тўлмаган камида 4 нафар фарзанди бўлган ёхуд фарзандларидан бирида ногиронлик бўлган шахс учун коэффициент 20 фоиз бандга оширилади.

Касаллик даври учун ким тўлайди?

Вақтинча меҳнатга лаёқатсизлик даврининг:

дастлабки 5 кунигача бўлган қисми — иш берувчи томонидан;
6-кундан бошлаб — Давлат ижтимоий суғурта жамғармаси томонидан тўланади.

Нафақа бир календарь йилда, қоида тариқасида, жами 182 календарь кундан ошмаган давр учун тўланади.

Қайси даврларда нафақа тўланмайди?

Вақтинча меҳнатга лаёқатсизлик:

иш ҳақи сақланмайдиган таътилга;
иш ҳақи қисман сақланадиган таътилга;
болани парваришлаш таътилига;
ҳарбий ўқув ёки текширув йиғинига;
ишлаб чиқаришдан ажралмаган ҳолдаги ўқув таътилига тўғри келса, мазкур давр учун нафақа тўланмайди.

Норматив ҳужжатлар

«Давлат ижтимоий суғуртаси тўғрисида»ги Қонун

Вазирлар Маҳкамасининг 2025 йил 17 декабрдаги 796-сон қарори