Участка сайлов комиссиялари қандай жиҳозланиши керак?

Участка сайлов комиссияси жойлашган бино сайловчилар эркин ва яширин овоз бериши, комиссия эса ўз вазифаларини тўлиқ бажариши учун зарур шароитлар билан таъминланиши керак. Биноларни жиҳозлаш ва уларда зарур тартибни сақлаб туриш учун участка сайлов комиссияси масъул ҳисобланади.

Участкада нималар бўлиши керак?

Участка сайлов комиссияси жойлашган бинода қуйидагилар бўлиши лозим:

Ўзбекистон Республикасининг Давлат байроғи — бинонинг устида ва ичида;
Ўзбекистон Республикасининг Давлат герби — бино ичида;
сайлов участкасининг тартиб рақами кўрсатилган пешлавҳа;
яширин овоз бериш учун кабиналар ёки хоналар;
сайлов қутилари;
зарурат бўлганда жисмоний имконияти чекланган шахслар учун махсус жиҳозланган яширин овоз бериш кабиналари;
кузатувчилар учун алоҳида жойлар;
сайлов санасига бағишланган плакатлар;
сайлов участкасининг харитаси;
участка сайлов комиссияси аъзоларининг таркиби, иш режаси ва навбатчиликлар жадвали ҳақидаги ахборот;
сайловга тайёргарлик кўриш ва уни ўтказишга оид маълумотлар жойлаштириладиган махсус стенд;
зарур мебель ва офис техникаси;
телефон, принтер, сейф ва канцелярия товарлари;
Интернетга уланган ҳамда Сайлов жараёнини бошқариш ахборот тизимига кириш имкониятига эга компьютерлар;
ёнғинга қарши воситалар.

Номзодлар ва сиёсий партиялар ҳақида қандай маълумот бўлади?

Сайлов участкасида сайловчи танлов қилиш учун зарур бўлган ахборот билан танишиши мумкин бўлиши керак.

Махсус стендда, жумладан:

бир мандатли сайлов округлари бўйича рўйхатга олинган номзодларнинг таржимаи ҳоли ва дастурларининг асосий йўналишлари;
сайловда иштирок этаётган сиёсий партиянинг дастури;
партия рўйхати жойлаштирилади. Ушбу материаллар тегишли сайлов комиссиялари томонидан тайёрланади ёки нашр қилинади.

Овоз бериш хонаси қандай ташкил этилади?

Овоз бериш хонасида яширин овоз бериш учун етарли миқдорда кабиналар ёки хоналар бўлиши, сайлов бюллетенларини бериш учун алоҳида жой ажратилиши ва сайлов қутилари ўрнатилиши керак.

Сайлов қутилари шундай жойлаштириладики, сайловчи уларнинг олдига боришдан аввал албатта яширин овоз бериш кабинаси ёки хонаси орқали ўтади. Бу сайловчининг танлови сир сақланишини таъминлашга хизмат қилади.

Имконияти чекланган шахслар учун қандай шароит бўлиши керак?

Овоз бериш хоналари:

ёруғ ва кенг;
алоҳида кириш ва чиқиш жойига эга;
жисмоний имконияти чекланган шахслар учун кириш имконини таъминлайдиган нишаб йўлкалар билан жиҳозланган бўлиши керак.

Зарурат бўлганда улар учун махсус жиҳозланган яширин овоз бериш кабиналари ҳам ташкил этилади.

Бино қачон тайёр бўлиши керак?

Лозим даражада жиҳозланган овоз бериш биноси сайлов комиссиясига сайловдан камида 11 кун олдин тақдим этилиши керак.

Давлат органлари, корхоналар, муассасалар ва ташкилотлар сайловга тайёргарлик кўриш ва уни ўтказиш учун зарур бинолар ҳамда жиҳозларни сайлов комиссиялари ихтиёрига бепул бериб туриши шарт.

Моддий-техник шароитни ким таъминлайди?

Туташ ҳудудларни ободонлаштириш, фуқаролар учун зарур шароитларни яратиш, сайлов комиссияларини:

техник воситалар;
мебель ва ашёлар;
офис техникаси;
транспорт билан таъминлаш маҳаллий ижро этувчи ҳокимият органлари зиммасига юклатилган.

Алоқа воситалари билан таъминлаш эса рақамли технологиялар соҳасидаги ваколатли давлат органи томонидан амалга оширилади.

Эслатма: овоз бериш биносида сайлов жараёнига алоқадор бўлмаган бошқа сиёсий тадбирларни ўтказишга йўл қўйилмайди.

Норматив ҳужжатлар

Ўзбекистон Республикасининг Сайлов кодекси, 25.06.2019 йил