Наркология диспансери ҳисобида туриши ёки турмаслиги тўғрисида маълумотнома олиш

Маълумотнома мазмуни

Маълумотнома фуқаронинг наркология диспансери ҳисобида:

туриши;
турмаслиги тўғрисидаги расмий маълумотни тасдиқлайди.

Маълумотнома ишга жойлашиш, ҳайдовчилик ҳуқуқини олиш, лицензия ёки рухсатнома расмийлаштириш ва қонунчиликда назарда тутилган бошқа ҳолатларда талаб қилиниши мумкин.

Мурожаат қилувчилар

Хизматдан:

фуқаронинг ўзи;
ота-онаси;
эри ёки хотини;
болалари;
ака-укалари ва опа-сингиллари фойдаланиши мумкин.

Ишончли вакил орқали мурожаат қилинса, нотариал тасдиқланган ишончнома талаб этилади.

Ариза бериш тартиби

Ариза Давлат хизматлари марказига шахсан ёки my.gov.uz орқали электрон шаклда берилади.

Сўровномада:

фамилия, исм ва ота исми;
ўзгарган бўлса, аввалги шахсий маълумотлар;
паспорт ёки ID-карта маълумотлари ва ЖШШИР;
яшаш манзили;
телефон рақами ва электрон почта;
маълумотнома олинадиган тил кўрсатилади.

Маълумотнома ўзбек, рус ёки инглиз тилида расмийлаштирилиши мумкин.

Йиғим, муддат ва натижа

Хизмат учун БҲМнинг 2 фоизи миқдорида йиғим ундирилади.

Маълумотнома реал вақт режимида шакллантирилади. Электрон ҳужжат ваколатли органнинг электрон рақамли имзоси билан тасдиқланади ва унга QR-код қўйилади.

Давлат хизматлари маркази орқали мурожаат қилган шахс маълумотномани электрон ёки қоғоз шаклида олиши мумкин.

Муҳим: наркология маълумотномасини олиш вақтида руҳий касалликлар бўйича диспансер ҳисобида туриши ёки турмаслиги ҳақидаги маълумотномани ҳам бир вақтда буюртма қилиш мумкин. Бунда ҳар икки хизмат учун белгиланган йиғимлар бир йўла тўланади.

Хизматни рад этиш

Сўровномада нотўғри маълумотлар кўрсатилса ёки йиғим тўланмаса, хизмат рад этилади. Бошқа сабаблар билан рад этишга йўл қўйилмайди.

Ҳужжатлар ёки маълумотларда бартараф этиш мумкин бўлган камчиликлар аниқланса, ариза берувчига уларни тузатиш учун 5 иш куни берилади.

Ваколатли орган берган маълумотномада хато аниқланса, ариза берувчи 15 кун ичида йиғим тўламасдан қайта мурожаат қилиш ҳуқуқига эга.

Норматив ҳужжатлар

Вазирлар Маҳкамасининг 2023 йил 20 ноябрдаги 612-сон қарори