Ҳайвонларга нисбатан шафқатсиз муомала учун жавобгарлик

Нима шафқатсиз муомала ҳисобланади

Ҳайвонни:

— қийнаш;

— унга азоб ёки жабр етказиш ғаразли ёки бошқа паст ниятларда содир этилса, маъмурий жавобгарликка сабаб бўлади.

Биринчи марта содир этилса

Ҳайвонларга нисбатан шафқатсиз муомала учун 3 БҲМдан 5 БҲМгача жарима белгиланган.

Қачон жазо оғирлашади

Агар шу ҳуқуқбузарлик:

— маъмурий жазо қўлланилганидан кейин 1 йил ичида такроран содир этилса;

— вояга етмаган шахс иштирокида содир этилса;

— ҳайвоннинг ўлими ёки майиб бўлишига олиб келса,

5 БҲМдан 10 БҲМгача жарима ёки 15 суткагача маъмурий қамоқ қўлланилиши мумкин.

Эслатма: ҳайвоннинг ўлими ёки майиб бўлиши биринчи ҳолатнинг ўзида ҳам оғирлаштирилган маъмурий жавобгарликка сабаб бўлиши мумкин. Жиноий жавобгарлик учун эса қўшимча шарт — шу каби ҳаракат учун аввал маъмурий жазо қўлланган бўлиши талаб этилади.

Қачон жиноий жавобгарлик юзага келади

Агар шахс ҳайвонни қийнаш ёки унга азоб бериш натижасида унинг ўлими ёки майиб бўлишига сабаб бўлса ва у аввал худди шундай ҳаракат учун маъмурий жазога тортилган бўлса, жиноий жавобгарлик келиб чиқади.

Бундай қилмиш учун:

— 25 БҲМдан 50 БҲМгача жарима;

— 240 соатгача мажбурий жамоат ишлари;

— 1 йилгача ахлоқ тузатиш ишлари;

— 6 ойгача озодликни чеклаш;

— ёки 6 ойгача озодликдан маҳрум қилиш белгиланиши мумкин.

Ҳайвонни сақлаш қоидасини бузиш бошқа ҳуқуқбузарлик

Ҳайвонни қийнаш билан уни сақлаш қоидаларини бузиш бир хил ҳуқуқбузарлик эмас.

Шаҳар ва бошқа аҳоли пунктларида ҳайвонларни сақлаш қоидаларини бузиш учун ҳам алоҳида маъмурий жавобгарлик мавжуд. Агар бундай қоидабузарлик инсон саломатлигига ёки мол-мулкка зарар етказса, жазо оғирлашади.

Шундай ҳолатга гувоҳ бўлганда

Ҳайвонга нисбатан зўравонлик давом этаётган бўлса, ҳуқуқни муҳофаза қилувчи органларга хабар бериш мумкин.

Имкони бўлса:

— фото ёки видеони;

— ҳодиса жойи ва вақтини;

— гувоҳлар маълумотларини;

— ҳайвоннинг ҳолатини тасдиқловчи материалларни сақлаб қолиш мақсадга мувофиқ.

Бунда шахс ўз хавфсизлигини хавф остига қўймаслиги лозим.