Оммавий ахборот воситалари тўғрисидаги қонунчиликни бузганлик учун жавобгарлик

Қонунчиликни бузганлик учун жавобгарлик

Оммавий ахборот воситалари тўғрисидаги қонунчиликни бузишда айбдор шахслар қонунчиликда белгиланган тартибда фуқаролик, маъмурий ёки жиноий жавобгарликка тортилиши мумкин.

ОАВ бош муҳаррири оммавий ахборот воситасининг чиқарилиши ҳақида қарор қабул қилади ва унинг фаолияти учун қонунчиликка мувофиқ жавоб беради. Журналист ҳам ўзи тайёрлаган ва тарқатган материалларнинг ҳаққонийлигини текшириши шарт.

Жавобгарликдан озод қилувчи ҳолатлар

Бош муҳаррир ва журналист ОАВда ҳақиқатга мос келмайдиган материал тарқатганлик учун қуйидаги ҳолларда жавобгар бўлмайди:

маълумотлар расмий хабарлар, норматив-ҳуқуқий ҳужжатлар ёки расмий статистика ҳисоботларидан олинган бўлса;
маълумотлар ахборот агентликлари, давлат ҳокимияти ва бошқаруви органларининг матбуот хизматлари ёки уларнинг расмий веб-сайтлари орқали олинган бўлса;
маълумотлар олдиндан ёзиб олинмасдан эфирга бериладиган муаллифлик чиқишларида мавжуд бўлса;
тарқатилган материал бошқа шахс чиқишининг сўзма-сўз такрори, стенограмма, аудио ёки видеоёзуви бўлса.

Муҳим: расмий манбадаги маълумот мазмунини ўзгартириш, уни нотўғри талқин қилиш ёки манбада бўлмаган хулосани қўшиш журналистни автоматик равишда жавобгарликдан озод қилмайди.

Ёлғон ахборот тарқатиш учун жарималар

Шахснинг қадр-қимматини камситадиган ёки уни обрўсизлантирадиган ёлғон ахборотни ОАВда, телекоммуникация тармоқларида ёки Интернетда тарқатиш:

БҲМнинг 50 баравари миқдорида жарима солишга сабаб бўлади.

Жамоат тартибига ёки хавфсизлигига таҳдид солувчи ёлғон ахборотни тарқатиш:

БҲМнинг 50 бараваридан 100 бараваригача жарима солишга сабаб бўлади.

ОАВ маҳсулотини белгиланган тартибда рўйхатдан ўтказмасдан ёки уни чиқариш ёхуд нашр этишни тўхтатиш ҳақида қарор қабул қилинганидан кейин қонунга хилоф равишда тайёрлаш ва тарқатиш:

босма ёки бошқа маҳсулотни мусодара қилиб, БҲМнинг 3 бараваридан 5 бараваригача жарима солишга сабаб бўлади.

Сунъий интеллект технологияларидан фойдаланган ҳолда шахсга доир маълумотларга қонунга хилоф равишда ишлов бериш ва уларни ОАВда, телекоммуникация тармоқларида ёки Интернетда тарқатиш:

ҳуқуқбузарлик ашёларини мусодара қилиб, БҲМнинг 50 бараваридан 100 бараваригача жарима солишга сабаб бўлади.

Раддия ва жавоб бериш ҳуқуқи

Юридик ёки жисмоний шахс ўзи ҳақида ОАВда тарқатилган, ҳақиқатга мос келмайдиган ва унинг шаъни, қадр-қиммати ёки ишчанлик обрўсига путур етказадиган маълумотлар юзасидан таҳририятдан раддия беришни талаб қилишга ҳақли.

Материал туфайли ҳуқуқлари ва қонуний манфаатлари бузилган шахс мазкур ОАВда раддия ёки жавоб эълон қилиш, шунингдек зарарни ундириш ва маънавий зиённи компенсация қилиш тўғрисида судга мурожаат этиши мумкин.