Ўзбекистон Республикаси журналистининг чет элдаги ва чет эл журналистининг Ўзбекистон Республикасидаги фаолияти

Ўзбекистон журналистининг чет элдаги фаолияти

Ўзбекистон Республикаси журналисти чет элда касбий фаолиятини:

Ўзбекистон Республикаси қонунчилиги;
ўзи фаолият юритаётган ёки аккредитация қилинган давлат қонунчилиги;
тегишли халқаро шартномалар асосида амалга оширади.

Журналист хорижий давлатда фаолият юритишдан олдин ўша давлатнинг аккредитация, виза, ахборот олиш, фото ва видео тасвирга олишга оид талабларини текшириши лозим.

Чет эл журналистини аккредитация қилиш

Хорижий давлат ОАВ мухбири Ўзбекистон ҳудудида касбий фаолиятни Ташқи ишлар вазирлигида аккредитациядан ўтганидан кейин амалга оширади.

Доимий хорижий мухбири аккредитация қилиш учун манфаатдор хорижий ОАВ раҳбарияти ташқи ишлар вазири номига мурожаат юборади. Мурожаатга:

хорижий ОАВ ҳақида маълумотнома;
аккредитация қилинаётган мухбири таржимаи ҳоли;
белгиланган намунадаги 4 та фотосурат илова қилинади.

Мурожаат Ўзбекистоннинг хориждаги дипломатик ёки консуллик муассасаси орқали ёхуд бевосита Ташқи ишлар вазирлигига тақдим этилади.

Муддатлар

Доимий хорижий мухбири аккредитация қилиш ҳақидаги қарор мурожаат келиб тушганидан кейин 2 ойдан кечиктирмай қабул қилинади. Доимий аккредитация гувоҳномаси 2 йилгача муддатга берилади.

Вақтинча хорижий мухбири аккредитация қилиш ҳақидаги қарор ОАВ раҳбариятининг ёзма мурожаати тақдим этилганидан кейин 2 ҳафтадан кечиктирмай қабул қилинади. Вақтинча аккредитация гувоҳномаси 3 ойгача муддатга берилади.

Муҳим: хорижий журналистнинг Ўзбекистонга кириш визаси борлиги уни автоматик равишда журналистлик фаолиятини амалга ошириш учун аккредитация қилинган деб ҳисоблашга асос бўлмайди.

Аккредитация қилинган журналистнинг ҳуқуқлари

Ўзбекистонда аккредитация қилинган чет эл журналисти ахборот тўплаш ва тарқатишда Ўзбекистон журналисти билан тенг ҳуқуқларга эга.

У оғзаки, ёзма ёки аудиовизуал ахборотни алоқа каналлари орқали ўзи вакиллик қилаётган хорижий ОАВга юборишга ҳақли. Унинг ҳуқуқлари, шаъни ва қадр-қиммати қонун билан ҳимоя қилинади, касбий фаолиятига аралашиш тақиқланади.

Мажбуриятлар ва аккредитацияни бекор қилиш

Чет эл журналисти Ўзбекистон ҳудудида:

Ўзбекистон қонунчилигига;
ОАВ ва журналистлик фаолиятига оид талабларга;
виза, бўлиш ва аккредитация қоидаларига риоя қилиши шарт.

Қонунчилик бузилганда Ташқи ишлар вазирлиги журналистни огоҳлантириши, аккредитацияни муддатидан олдин бекор қилиши, визани аннуляция қилиши ёки қонунчиликда назарда тутилган бошқа чораларни қўллаши мумкин.

Аккредитацияни рад этиш сабаблари журналистга ёзма шаклда маълум қилиниши керак. Аккредитацияни бекор қилиш ҳақидаги қарор устидан судга шикоят қилиш мумкин.