Иссиқ ҳавода ҳайдовчи ва автомобиль хавфсизлиги

Юқори ҳарорат ҳайдовчининг диққати ва реакция тезлигини пасайтириши, сувсизланиш ва иссиқ уришига олиб келиши мумкин. Қуёш остида қолган автомобиль салони эса ташқи ҳаводан анча юқори ҳароратгача қизийди.

Автомобиль салонини хавфсиз совитиш

Қуёшда узоқ турган автомобиль салонини совитиш учун:

дастлаб эшик ва ойналарни очиб, салондаги иссиқ ҳавони чиқариш;
ҳаракатни бошлагандан кейин қисқа вақт ойналарни очиқ ушлаш;
шундан сўнг ойналарни ёпиб, кондиционерни ишга тушириш;
салон совигач, кондиционер ҳарорати ва ҳаво оқимини мўътадил даражага ўтказиш тавсия этилади.

Автомобиль қаровсиз қолдирилганда ойналарни очиқ қолдириш хавфсизлик, ёғингарчилик ва салонга чанг кириши нуқтаи назаридан тавсия этилмайди.

Болалар ва ҳайвонларни салонда қолдирмаслик

Муҳим! Болалар, кексалар, соғлиғи заиф шахслар ва ҳайвонларни ёпиқ автомобилда қисқа вақтга ҳам ёлғиз қолдириш мумкин эмас.

Ойнанинг бироз очиқ қолдирилиши салонда ҳароратнинг хавфли даражага кўтарилишини тўхтатмайди. Зарур ҳолатда дарҳол 112 ягона диспетчерлик хизматига мурожаат қилиш керак.

Совитиш тизими ва кондиционер

Ёз мавсуми бошланишидан олдин:

салон фильтри;
кондиционернинг ишлаш ҳолати;
радиатор ва совитиш вентилятори;
антифриз сатҳи;
шланглар ва уланиш жойлари текширилиши керак.

Муҳим! Қизиган двигателда радиатор ёки кенгайтириш бачоги қопқоғини очманг. Қайноқ суюқлик оғир куйишга сабаб бўлиши мумкин.

Антифриз камайганда автомобилни ишлаб чиқарувчининг қўлланмасига мувофиқ суюқлик қўшилади. Дистилланган сувдан фақат фавқулодда ҳолатда ва двигатель совиганидан кейин фойдаланиш мумкин.

Шина ва тормозларни текшириш

Шинадаги босим шина совуқ ҳолатда текширилади. Қизиб турган шинада босим юқори кўриниши табиий, шу сабабли бундай пайтда ҳавони ўзбошимчалик билан чиқариб юбориш мумкин эмас.

Протектор, ён деворлардаги ёриқлар, шина ишлаб чиқарилган сана ва захира ғилдирак ҳолати ҳам текширилади. Тормоз суюқлигининг сатҳи ва алмаштириш муддати ишлаб чиқарувчи тавсиясига мувофиқ назорат қилинади.

Ёнилғи ва газ баллони

Ёнилғи қуйиш шохобчасида бакни пистолет автоматик равишда ўчганидан кейин қўшимча равишда тўлдириш тавсия этилмайди.

Газ-баллон ускунаси ўрнатилган автомобилда баллон, қувурлар, клапанлар ва мультиклапаннинг созлиги мунтазам текширилади. Газ ҳиди сезилса, двигатель ишга туширилмайди ва автомобиль очиқ жойда қолдирилиб, мутахассис чақирилади.

Салонда хавфли буюмларни қолдирмаслик

Қуёш остидаги автомобилда:

зажигалка;
аэрозол идишлари;
газли ичимликлар;
дори воситалари;
телефон, пауэрбанк ва бошқа аккумуляторли қурилмалар;
тез бузиладиган озиқ-овқат қолдирилмаслиги керак.

Қуёшдан ҳимоя воситалари

Автомобиль тўхтаб турганда олд ойнага махсус қуёшдан ҳимоя экрани ўрнатиш мумкин. Автомобиль учун мўлжалланган сифатли ёпқич ҳам кузов ва салоннинг қизишини камайтиради.

Ойналарни қорайтириш фақат белгиланган техник талаблар асосида амалга оширилади. Тегишли ҳолларда автомобиль ойналарининг тусини ўзгартиришга рухсатнома олиниши керак.

Ҳайдовчи ҳар қандай об-ҳавода ҳаракат тезлигини йўл, кўриниш ва транспорт воситасининг ҳолатини ҳисобга олган ҳолда танлаши шарт. Бу талаб Вазирлар Маҳкамасининг 2022 йил 12 апрелдаги 172-сон қарори билан тасдиқланган Йўл ҳаракати қоидаларида белгиланган.