Давлат уй-жой фондидаги уй-жойни хусусийлаштириш тартиби

Хусусийлаштирилиши мумкин бўлган уй-жойлар

Давлат уй-жой фондини хусусийлаштириш — фуқарога у эгаллаб турган ёки янги қурилган давлат уй-жойини сотиш, имтиёзли асосда сотиш ёки текин мулк қилиб беришдир.

Қуйидагилар хусусийлаштириш объекти бўлиши мумкин:

ижара шартномаси асосида фойдаланилаётган квартира ёки бир квартирали уй;
қайта тикланган ёки таъмирланган, аммо ҳали фуқаролар кўчиб кирмаган бўш уй-жой;
янги қурилган уйдаги квартира.

Хусусийлаштирилмайдиган уй-жойлар

Қуйидагилар хусусийлаштирилмайди:

ёпиқ ҳарбий шаҳарчалардаги квартиралар;
архитектура, тарих ёки маданий мерос объекти бўлган уй-жойлар ва уй-музейлар;
ётоқхона хоналари;
яшаш учун яроқсиз деб топилган турар жойлар;
хизмат квартиралари ва хоналари;
икки ёки ундан ортиқ ижарачи яшайдиган квартиралар — барча яшовчиларнинг розилиги бўлмаса.

Аниқ мақсадли коммунал уй-жой фондида хусусийлаштириш ҳуқуқисиз ижарага берилган уй-жой ҳам умумий тартибда хусусийлаштирилмайди.

Мурожаат ва ҳужжатлар

Вазирлар Маҳкамасининг 2024 йил 11 мартдаги 124-сон қарори бўйича фуқаро Давлат хизматлари марказига мурожаат қилади ёки ЯИДХП орқали электрон сўровнома юборади.

Сўровномага қуйидагилар илова қилинади:

имтиёзли хусусийлаштириш ҳуқуқи бўлса, уни тасдиқловчи маълумотнома;
уй дафтари ёки квартира карточкасининг нусхаси;
бирга яшаётган барча вояга етган оила аъзоларининг нотариал тасдиқланган розилиги;
баҳоловчи ташкилотнинг уй-жой қиймати тўғрисидаги ҳисоботи.

Давлат хизмати учун 1 БҲМ миқдорида йиғим ундирилади. ЯИДХП орқали мурожаат қилинганда йиғимнинг 90 фоизи тўланади. Қонунчиликда белгиланган ижтимоий тоифаларга 50 ёки 75 фоизлик чегирма қўлланилади.

Қарор ва давлат ордери

Ҳокимлик ёки уй-жойни балансда сақловчи ташкилот сўровномани бир ой ичида кўриб чиқиб, хусусийлаштириш ёки рад этиш ҳақида қарор қабул қилади.

Ижобий қарордан кейин фуқаро ҳисобварақни олган кундан бошлаб 10 иш кунида белгиланган тўловни амалга оширади. Тўлиқ тўловдан кейин ҳокимлик бир иш кунида QR-кодли мулк ҳуқуқини берувчи давлат ордерини расмийлаштиради.

Муҳим: давлат уй-жой фондини хусусийлаштириш ҳуқуқи шахсга фақат бир марта берилади. Мулк ҳуқуқи уй-жойнинг тўлиқ қиймати тўланган ва давлат ордери олинганидан кейин юзага келади.

Олинган ҳуқуқ кўчмас мулкка бўлган ҳуқуқлар давлат реестрида рўйхатдан ўтказилиши лозим.