Телефон хизматидан фойдаланиш шартлари

Как «скрестить» стационарный телефон с мобильным, сэкономив на звонках

Телефон алоқаси хизматларининг турлари

Телефон алоқаси хизматлари оператор ёки провайдернинг лицензияси, телекоммуникациялар тармоғининг имкониятлари ва абонент билан тузилган шартнома асосида кўрсатилади.

Универсал хизматлар барча фойдаланувчилар учун белгиланган сифатда кўрсатилиши шарт бўлган хизматлар бўлиб, уларга:

умумий фойдаланишдаги телекоммуникациялар тармоғидан фойдаланиш;
маҳаллий телефон алоқаси;
шаҳарлараро ва халқаро телефон алоқаси;
қонунчиликда белгиланган бошқа асосий хизматлар киради.

Оператор техник имкониятларидан келиб чиқиб қўшимча пуллик ёки бепул хизматларни ҳам таклиф қилиши мумкин.

Қўшимча телефон алоқаси хизматлари

Қўшимча хизматларга, жумладан:

телефон аппарати ёки бошқа қурилмани қайта ўрнатиш ва қайта улаш;
параллел телефон аппаратини ўрнатиш;
алоқа каналларини ижарага бериш;
маълумот-ахборот хизматлари;
абонент рақамини ўзгартириш;
қўнғироқлар ва ҳисоб-китоблар тафсилотини тақдим этиш;
конференц-алоқа;
операторнинг техник имкониятларидан келиб чиқадиган бошқа хизматлар кириши мумкин.

Бепул хизматлар жумласига телефон тармоғининг таъмирлаш бюросини чақириш, аҳоли пункти ёки оператор коди, халқаро кодлар ва амалдаги тарифлар ҳақида маълумот олиш каби хизматлар киритилган.

Оператор абонентнинг розилигисиз пуллик қўшимча хизматни улаши, хизматни мажбуран таклиф қилиши ёки кўрсатилмаган хизмат учун ҳақ ундириши мумкин эмас.

Хизматлар тўплами, тариф режаси ёки янги пуллик хизмат абонентнинг танлови тасдиқланмасдан автоматик равишда ўзгартирилишига йўл қўйилмайди.

Абонентга қандай маълумотлар берилиши керак

Оператор абонентга қуйидаги маълумотларни очиқ ва бепул тақдим этиши шарт:

кўрсатиладиган универсал ва қўшимча хизматлар;
пуллик ва бепул хизматлар рўйхати;
тарифлар, имтиёзлар ва тўлов тартиби;
хизмат кўрсатишдаги чекловлар;
шартнома тузиш ва мурожаатларни кўриб чиқиш тартиби;
операторнинг манзили, телефон рақамлари, расмий веб-сайти ва иш вақти.

Универсал телефон алоқаси хизматлари тарифлари ўзгарса, оператор бу ҳақда янги тарифлар кучга киришидан камида 15 кун олдин расмий веб-сайти ва оммавий ахборот воситалари орқали хабар бериши керак.

Сифатсиз хизмат кўрсатилганда

Абонентнинг айбисиз телефон алоқаси ишламаган ва бу ҳақда таъмирлаш бюросида талабнома рўйхатга олинган бўлса, абонент:

хизмат ҳақини қайта ҳисоблашни;
асоссиз уланган пуллик хизмат учун тўланган маблағни қайтаришни;
камчиликларни бепул бартараф этишни;
хизмат нархини камайтиришни;
етказилган зарарни қоплашни талаб қилиши мумкин.

Шошилинч вазиятларда 112 ягона диспетчерлик хизмати ва белгиланган бошқа шошилинч хизмат рақамларига қўнғироқ қилиш имконияти таъминланади.

Мазкур тартиб Телекоммуникациялар хизматларини кўрсатиш қоидалари билан белгиланган.