Тазйиқ ва зўравонликдан жабрланган хотин-қизларни ижтимоий реабилитация қилиш ва мослаштириш

Мурожаатни қабул қилиш ва ҳолатни баҳолаш

Тазйиқ ёки зўравонлик ҳолати ҳақида:

ички ишлар органларининг 102 қисқа рақамига;
112 ягона диспетчерлик хизматига;
1146 ишонч телефонига;
профилактика инспекторига;
«Инсон» ижтимоий хизматлар маркази ёки маҳалладаги ижтимоий ходимга хабар бериш мумкин.

«Инсон» маркази ижтимоий ходими жабрланган хотин-қиз ва унинг вояга етмаган фарзандларининг ҳолатини баҳолайди. Баҳолаш хотин-қизнинг розилиги асосида амалга оширилади.

Кўрсатиладиган ижтимоий хизматлар

Баҳолаш натижасига кўра бир ёки бир нечта чора қўлланиши мумкин:

кундузги қатнов шаклида қисқа ёки узоқ муддатли ижтимоий, психологик ва ҳуқуқий хизматлар;
шифохонанинг бирламчи кўмак хонасига жойлаштириш;
тазйиқ ёки зўравонлик ҳолатини рўйхатга олиш ва ҳимоя ордерини расмийлаштириш;
чуқурлаштирилган реабилитация учун ҳудудий марказга жойлаштириш.

«Инсон» марказининг ижтимоий, психологик ва ҳуқуқий хизматларини олиш учун ҳимоя ордери бўлиши шарт эмас.

Бирламчи кўмак хонасига хотин-қиз ва унинг вояга етмаган фарзандлари уч суткадан кўп бўлмаган муддатга жойлаштирилади. Уларга тиббий ёрдам, психиатр кўриги, овқат ва шахсий гигиена воситалари тақдим этилади.

Чуқурлаштирилган реабилитация

Чуқурлаштирилган реабилитацияга эҳтиёж бўлса, «Инсон» маркази бўш ўринни аниқлайди ва зарур ҳужжатларни электрон шаклда ҳудудий марказга юборади. Туман ёки шаҳар ички ишлар органи хотин-қиз ва унинг фарзандларини марказга олиб боради.

Марказда беш иш куни ичида комплекс баҳолаш ўтказилиб, якка тартибдаги ижтимоий реабилитация дастури ишлаб чиқилади. Дастур доирасида тиббий, психологик, ҳуқуқий ва ижтимоий хизматлар кўрсатилади, болаларни таълим муассасасига жойлаштириш, хотин-қизни касбга ўқитиш ва бандлигини таъминлашга кўмаклашилади.

Марказга жойлаштириш ва реабилитация хизматларини кўрсатиш хотин-қизнинг розилиги асосида амалга оширилади.

Тартиб «Хотин-қизларни тазйиқ ва зўравонликдан ҳимоя қилиш тўғрисида»ги Қонун, Президентнинг ПҚ-175-сон қарори ва Вазирлар Маҳкамасининг 354-сон қарори билан белгиланган.