Алимент миқдорини камайтириш ёки алимент тўлашдан озод қилиш

Қачон алимент миқдори камайтирилиши мумкин?

Суд алимент миқдорини, жумладан, қуйидаги ҳолатларда камайтириши мумкин:

алимент тўловчининг бошқа вояга етмаган болалари бўлиб, белгиланган алимент тўланиши натижасида улар алимент олаётган болага нисбатан моддий жиҳатдан камроқ таъминланиб қолса;
алимент тўловчи ота ёки она ногиронлиги бўлган шахс бўлиб, моддий жиҳатдан қийналаётган бўлса;
алимент олаётган шахс мустақил даромадга эга бўлса.

Ушбу ҳолатлар юзага келиши алимент миқдорини автоматик равишда камайтирмайди. Белгиланган миқдорни ўзгартириш учун суд қарори талаб этилади.

Қачон алимент тўлашдан озод қилиш мумкин?

Агар вояга етмаган бола давлат ёки нодавлат муассасасининг тўлиқ таъминотида бўлса, суд алимент тўловчининг моддий аҳволини ҳисобга олиб, алимент миқдорини камайтириши ёки уни алимент тўлашдан озод қилиши мумкин.

Агар суд ҳужжати ижро этилаётган вақтда бола алимент тўлаётган ота ёки онанинг тарбияси ва қарамоғига ўтса, кейинги алимент тўловларидан озод қилиш масаласи ҳам судга тегишли даъво киритиш орқали ҳал қилинади.

Қаерга мурожаат қилинади?

Алимент миқдорини камайтириш ёки алимент тўлашдан озод қилиш тўғрисидаги даъво жавобгар доимий яшаб турган ёки доимий машғул бўлган жойдаги судга берилади.

Агар алимент бир нечта шахс фойдасига ундирилаётган бўлса, ишни кўришда барча ундирувчилар жалб қилиниши лозим.

Суд алимент миқдорини ўзгартирса, янги миқдордаги алимент суднинг ҳал қилув қарори қонуний кучга кирган кундан бошлаб ундирилади.

Камайтиришга асос бўлган ҳолат тугаса нима бўлади?

Алимент миқдорини камайтириш ёки тўлашдан озод қилишга асос бўлган ҳолатлар кейинчалик тугаса, манфаатдор шахс алиментни қонунда назарда тутилган миқдорда қайта ундиришни сўраб судга мурожаат қилиши мумкин.

Олдинги суд қарори бўйича алиментни ўзбошимчалик билан камайтириш ёки тўлашни тўхтатиш мумкин эмас. Бу масала суд тартибида ҳал қилинади.