Шаҳарсозлик ҳужжатлари экспертизаси

Экспертизани ўтказувчи ташкилотлар

Шаҳарсозлик ҳужжатлари экспертизаси:

махсус ваколатли давлат органининг ихтисослаштирилган таркибий бўлинмалари;
ваколатли вазирлик ва идораларнинг ихтисослаштирилган таркибий бўлинмалари;
эксперт комиссиялари ва эксперт гуруҳлари;
аккредитация қилинган юридик шахслар томонидан ўтказилади.

Алоҳида тартибга солинадиган шаҳарсозлик объектларининг ҳужжатлари махсус ваколатли давлат органининг ихтисослаштирилган таркибий бўлинмалари томонидан экспертизадан ўтказилади.

Экспертизада текшириладиган талаблар

Экспертиза жараёнида шаҳарсозлик ҳужжатларининг қуйидагиларга мувофиқлиги текширилади:

шаҳарсозлик тўғрисидаги қонунчилик;
шаҳарсозлик нормалари ва қоидалари;
ёнғин хавфсизлиги талаблари;
экологик нормалар ва қоидалар;
санитария қоидалари ва нормалари;
гигиена нормативлари;
энергия самарадорлиги ва энергия тежамкорлиги талаблари.

Қурилиш объектларининг шаҳарсозлик ҳужжатлари зилзилага бардошлилик ва ёнғин хавфсизлиги юзасидан мажбурий экспертизадан ўтказилади.

Экспертиза мажбурий бўлмаган объектлар

Қуйидаги объектларнинг шаҳарсозлик ҳужжатларини экспертизадан ўтказиш мажбурий эмас:

мавсумий ишлар учун вақтинчалик ва маиший бинолар;
ҳажми 300 куб метрдан ортиқ бўлмаган алоҳида қурилаётган кичик объектлар;
цоколни ҳисобга олмаганда икки қаватдан юқори бўлмаган, баландлиги 12 метрдан ва умумий майдони 500 квадрат метрдан ошмаган якка тартибдаги уй-жойлар;
I хавф-хатар тоифасига кирувчи объектлар;
жорий таъмирланаётган бинолар ва иншоотлар.

Тўғридан-тўғри, шу жумладан чет эл инвестициялари ҳисобидан қуриладиган объектларда фақат шаҳарсозлик ҳужжатларининг смета қисмини экспертизадан ўтказиш талаб этилмайди. Бу бошқа мажбурий экспертиза талабларини бекор қилмайди.

Ҳужжатларни юбориш ва хулосани расмийлаштириш

Вазирлар Маҳкамасининг 2021 йил 17 сентябрдаги 579-сон қарорига мувофиқ, шаҳарсозлик ҳужжатлари экспертиза ташкилотига «Шаффоф қурилиш» миллий ахборот тизими орқали электрон шаклда юборилади.

Буюртмачи экспертизага тақдим этилган ҳужжатларнинг тўлиқлиги ва улардаги маълумотларнинг ишончлилиги учун жавоб беради.

Экспертиза буюртмачи ва эксперт ташкилоти ўртасида тузилган шартнома асосида ўтказилади. Экспертиза харажатлари лойиҳани ишлаб чиқиш қийматига киритилади.

Ижобий экспертиза хулосаси «Эксперт хулосаларининг ягона реестри»га киритилган тақдирдагина ҳақиқий ҳисобланади.

Ижобий хулоса шаҳарсозлик ҳужжатларини келишиш, тасдиқлаш ва кейинчалик амалга ошириш учун асос бўлади.